Жүкембаев пен Құсайынов 11 наурызда шаршы алаңға шықпайтын болды

Қазақстандық қос боксшы Батыр Жүкембаев (8-0, 7КО) пен Абылайхан Құсайынов (4-0, 4КО) 11 наурыз күні Давид Лемье мен Кертис Стивенс арасында өтетін бокс кешінде шаршы алаңға шықпайтын болды, деп хабарлады vesti.kz. Бұған дейін жерлестеріміздің біреуі ғана Лемье мен Стивенс арасындағы бокс кешінің андеркартында жұдырықтасатыны хабарланған. Алайда, бүгін екеуі де бұл кешке қатыспайтыны белгілі болды. Боксшыларымыздың келесі кездесулері сәуір айында өтуі мүмкін. Қазіргі уақытта Жүкембаев пен Құсайынов кіші Вес Улистің дәл осы кештегі дайындығына көмектесіп жатыр. Батыр Жүкембаев пен Абылайхан Құсайнов Канадада «Eye of the Tiger Management» компаниясымен жұмыс істеп келеді. Олардың менеджері – Анна Рева. Айта кетейік, Давид Лемье мен Кертис Стивенс арасындағы ұрыс 11 наурыз күні АҚШ-тың Верона қаласындағы Turning Stone Resort Casino аренасында өтеді.