Жеңімпазға – жаңа пәтер

Алматыда өткен XXVIIІ Дүниежүзілік қысқы Универ­сиаданың мультимедалисі Анна Шевченко Павлодар қаласынан екі бөлмелі пәтерге ие болды. Жақында облыс әкімі Болат Бақауов спортшыға жаңа пәтердің кілтін табыс етті. Өңір басшысы өз сөзінде Универсиадаға қатысқан павлодарлық спортшылардың аяқ алысын жіті бақылағанын атап өтті. Сондай-ақ, ел қор­жынына 5 жүлде салған Анна Шевченконың табан­дылығына тәнті болғанын жеткізді. А.Шевченко Универ­сиа­дадан кейін Эстония және Финляндия елдерінде өткен халықаралық жарыстарға қатысты. Оның ендігі мақ­­саты – келер жылы Ко­рея Рес­публикасында ұйымдас­ты­рылатын қысқы Олим­пиадаға жолдама алу. Сондықтан, ол төрт жылдықтың басты додасына тыңғылықты дайын­дықты бастайды. А.Шевченко – XXVIIІ Дүние­жүзілік қысқы Универ­сиа­дада Қазақстан құра­масына алғашқы жүлдені сыйлаған спортшы. Сондай-ақ, Алматыда 5 медальдан ен­ші­леген екі спортшының бірі – осы Шевченко. Ол ре­сей­лік шаңғышы Лилия Ва­­сильевамен бірге жеңіс тұғырына бес рет (1 алтын, 1 күміс және 3 қола) көтерілді. А. Шевченко үш қоланы жекелей сында иеленсе, алтын мен күмісті командалық жарыстарда олжалаған. А.Шевченко – бір Универ­сиадада 5 медаль ұтқан ал­ғашқы қазақстандық спортшы-студент. Бұған дейінгі рекорд шаңғышы Анастасия Слоноваға тиесілі еді. Ол осыдан екі жыл бұрынғы қыс­қы Универсиадада 2 алтын мен 2 күмісті, жалпы 4 медальды мойнына ілген-ді. Фархат ӘМІРЕНОВ, журналист ПАВЛОДАР