Димаштың тоғызыншы кезеңде қандай ән шырқайтыны белгілі болды (видео)

Қытайдың «I’m a Singer» байқауына қатысып жатқан қазақстандық әнші Димаш Құдайбергеннің байқаудың тоғызыншы кезеңінде қандай ән шырқайтыны белгілі болды, деп хабарлайды ҚазАқпарат. Sina weibo әлеуметтік желілерінде байқауға қатысушы әншілердің тоғызыншы кезеңде орындайтын әндерінің тізімі жарияланды. Отандасымыз америкалық Эрик Карменнің 1975 жылғы туындысы «All by Myself» әнін орындайтын болады. Бұл әнді канадалық әнші Селин Дион 1996 жылы орындап, әлемдік хитқа айналған. Айта кетейік, Димаш байқаудың төрт айналымын (сегіз кезең) артта қалдырып, өз жолын жалғастырып келеді. Бұл күнде бастапқы жеті әншіден тек үшеуі ғана қалды. Төртінші айналымда (жетінші және сегізінші кезең) Димаш «Даидидау» әнімен үшінші орын, қытайша «Таң атты» әнімен бесінші орынды иеленді. Төртінші айналымның қорытындысы бойынша Димаш бесінші орынды қанағат тұтып, келесі айналымға жолдама алған болатын.