Жаңғырту аясындағы ынтымақтастық

Оттава қаласында Қазақстан Президенті Н.Ә.Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты ел халқына Жолдауын талқылауға арналған дөңгелек үстел ұйымдастырылды, деп хабарлады Қазақстанның Канададағы елшілігі. Оған Канаданың үш негізгі фе­дералды партиясы болып табылатын Либералды, Кон­сер­вативті және Жаңа демо­кратиялық партиялардан Қауым­дар палатасының депутаттары, атап айтқанда, Шетел істері және халықаралық даму комитетінің төрағасы – «Қазақстан-Ка­нада» Парламентаралық ынтымақтастық тобының тең төрағасы Роберт Нолт, комитет төрағасының орынбасары Дин Алисон, комитет мүшелері Джон Маккей, Питер Фрагискатос, т.б. қатысты. Сонымен қатар, отырысқа Канада Сыртқы істер министрлігінің өкілдері, оның ішінде Шығыс Еуропа және Еуразия департаментінің директоры Кевин Рекс, сондай-ақ жетекші талдау орталықтарының өкілдері шақырылды. Қазақстанның Канададағы елшілігі дайындаған арнайы тұсаукесерде еліміздің бірінші және екінші жаңғыртылуы кезеңіндегі макроэкономикалық көрсеткіштердің өзгеру үрдісі бойынша инфографикалар, Қазақстанның мемлекеттілігі қалыптасуы мен егемендігі нығаюының негізгі қадамдары, Президент Н.Ә.Назарбаевтың халықаралық бастамалары туралы ақпарат көлденең тартылды. Қазақстанның Канададағы елшісі Константин Жигалов өзінің сөзінде Қазақстанның әлеуметтік-экономикалық қа­лыптасуы барысында қоғамды демократия­ландыру бойынша жүйелі шара қолданылып келгенін, белсенді сыртқы сая­саттың нәтижесінде еліміздің ха­лық­аралық сахнадағы беделі күннен-күнге өсе түсіп отыр­ғанын атап көрсетті. Үшінші жаңғырту шең­берінде Мемлекет басшысы белгілеген мақсаттар мен мін­деттерді, сондай-ақ Қазақ­стан мен Канаданың экономика құры­лымының ұқсастығын ескере отырып, энергетика, инвес­тиция, мемлекеттік қызметті реформалау, шағын және ор­та бизнесті қолдау салаларын­дағы Қазақстан-Канада ынты­мақ­тастығын одан әрі нығайтудың зор әлеуетіне назар аударылды. Канада парламентшілері Қазақстанның жетістіктері мен болашақ даму бағытына жоғары баға беріп, екі ел арасындағы өзара тиімді ынтымақтастықты ілгерілетуге ниетті екендіктерін қуаттады. Осыған байланысты, үстіміздегі жылғы қаңтар айында Канада парламенттік делегациясының Астана қаласына сапары шең­берінде Премьер-Министр Б.Са­ғын­таев, Сенат Төрағасы Қ.То­қаев, Мәжіліс Төрағасы Н.Нығ­матулин және басқа да лауазымды тұлғалармен сәтті кездесулер өткені айтылды. Дөңгелек үстелдің қоры­тын­дысы бойынша биыл екі ел арасындағы дипломатиялық қарым-қатынастар қалып­тасуы­ның 25 жылдығын мере­келеу шеңберінде бірқатар бір­лескен іс-шара өткізу туралы уағдаластыққа қол жеткізілді.