Көшеде мылтық жата ма?!

  Шымкент қаласы Абай аудандық полиция бөлімінің қызметкерлері 19 жасар жігітті қарумен ұстады деп хабарлайды «Egemen.Kz» тілшісі. Полицейлер көшеде күмәнділеу көрінген сөмке асынған жігітті тоқтатқан. 1998 жылғы Шымкенттің тұрғыны сөмкеге «Chick» деп аталатын мылтықты салып алыпты. Күдікті бұл мылтықты көшеден тауып алдым деп айтады. Полицейлерді мұндай дәлелмен алдап кету қиын. Өйткені, суық қарумен ұсталғандардың дені осы ертегіні айтады. Жақында ғана Шымкенттегі мешіттің қасында атыс болып, 14 жасар бозбала қайтыс болған еді. Бір адам ауру халде ауруханаға жеткізілген. Бір-бірін жақсы білетін адамдардың тұрмыстық кикілжуі осындай ауыр зардапқа ұрындырды. «Көшеден тауып алған» мылтықтың атылмай қоймайтындығы анық. Енді осы факт бойынша ҚР Қылмыстық кодексі 287-бабы «заңсыз сатып алу, беру, сату, сақтау, тасымалдау немесе қару-жарақ, оқ-дәрілерді, жарылғыш заттарды және жарылғыш құрылғыларды өткізу» бойынша құжатталып, сотқа дейінгі тергеу амалдары жүргізіліп жатыр.   Бақтияр ТАЙЖАН, «Егемен Қазақстан». Оңтүстік Қазақстан облысы.