Орал қаласындағы Достық үйінде Қазақстан халқы Ассамблеясының республикалық бірыңғай күні шеңберінде Батыс Қазақстан облыстық ҚХА активі және құрылымдық бөлімшелерінің төрағалары мен мүшелері конституциялық реформаны қолдауға арналған дөңгелек үстел мәжілісін өткізді.
– Елбасының қолы қойылып, заңды күшіне енген Қазақстан Республикасының жаңарған Конституциясы – ел дамуындағы тарихи оқиға. Біз осы тарихи сәттің куәгері болып отырмыз, – деді Батыс Қазақстан облысы Қазақстан халқы Ассамблеясы төрағасының орынбасары-хатшылық меңгерушісі Ғайса Қапақов.
«Халық арасында бір ай бойы талқыланып, 6 мыңдай ұсыныс-пікірден кейін Ата Заңға енгізілген 26 түзету мен толықтыру бүгінгі күн талабынан туған». Жиналғандар бір ауыздан осындай шешімге келді. Ассамблея кеңесінің мүшесі, тарих ғылымдарының кандидаты, М.Өтемісов атындағы Батыс Қазақстан мемлекеттік университетінің жалпы тарих және әлеуметтік-саяси пәндер кафедрасының доценті Захот Мухлисова билік тармақтарының ара салмағы әр кезеңде әртүрлі болатынын айтады. Ғалымның пікірінше, 1995 жылы Конституцияға биліктің вертикаль пәрменділігін енгізу сол кезеңдегі Қазақстанның саяси-әлеуметтік жағдайына орай жасалған ең дұрыс қадам болған. Бұл пікірді «Ауыл» партиясы БҚО филиалының жетекшісі Амангелді Баянов, Орал қаласы әкімі жанындағы қоғамдық келісім кеңесінің төрағасы Борис Чебаковтар да қолдады.
– Бұдан бұрын да Қазақстан Конституциясына өзгерістер мен толықтырулар енгізілген. Естеріңізде болса, осындай әр реформадан кейін еліміз ерекше дамып, тың серпіліс жасап келеді. Сондықтан, бұл жолы да солай болатынына күмәніміз жоқ. Конституциялық реформаны Қазақстан халқы Ассамблеясы мүшелері бір ауыздан қолдайды, – деді Ғайса Қапақов.
Жиын соңында Батыс Қазақстан облыстық Қазақстан халқы Ассамблеясының үндеуі қабылданды.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ