Мәселен, биылғы «Қазақстанның Үшінші жаңғыруы: жаһандық бәсекеге қабілеттілік» Жолдауы елдегі саяси жүйені жетілдіруге, адами капиталдың сапасын жоғарылатуға, отандық IT-саланы дамытуға, жаһандық экономикаға бәсекелестікті арттыруға, жаңа индустрияларды одан әрі ілгерілетуге негіз қалап отыр. Әлемді шарпыған экономикалық дағдарысқа қарамастан, халықты әлеуметтік қорғау үдерістерінің жалғасатыны да салиқалы саясат пен ұтымды бағдарламалардың олжасы екені анық.
Президенттің Жолдауында адами капитал сапасын жақсарту мен балабақшаларға қатысты кәсіпкерлікті дамытуда мемлекет-жекеменшік серіктестігі аясын кеңейтуге зор мүмкіндік берілгендігіне айрықша тоқталып өткім келеді. Елімізде демографиялық ахуалдың жылдан жылға жақсарып келе жатқанын ескерсек, балабақша мәселесі әрдайым өзекті болып қала бермек.
«Ең алдымен, білім беру жүйесінің рөлі өзгеруі тиіс. Біздің міндетіміз – білім беруді экономикалық өсудің жаңа моделінің орталық буынына айналдыру. Оқыту бағдарламаларын сыни ойлау қабілетін және өз бетімен іздену дағдыларын дамытуға бағыттау қажет», деп Елбасы Нұрсұлтан Назарбаев атап өткендей, келешек ұрпақтың алдында тұрған келелі міндеттерді тиянақты орындау үшін оларды ең бірінші кезекте сапалы біліммен сусындатуымыз керек. Адами капитал сапасының басты көрсеткіші ұстаз бен болашақ ұрпақтың білім деңгейінен айқын аңғарылады.
«Қала мен ауыл мектептері арасындағы білім беру сапасының алшақтығын азайту қажет», деген Елбасының сөзі қойнауы құт-берекеге толы ауылдың тыныс-тіршілігіне, ондағы мектептердің жаңа келбетіне, жалпы алғанда, ұрпақтың лайықты әрі сапалы білім алуына зор мүмкіндік беретіні анық. Мемлекет басшысы өз Жолдауында «Мектептердің және мұғалімдердің деңгейі, әсіресе, ауыл мен қалада әртүрлі. Білікті педагогтердің жетіспеу проблемасы бар», деп атап көрсетті. Бұдан біз алдымызда ауыл мұғалімдерінің бәсекеге қабілеттілігін арттыру міндеті тұрғанын аңғара аламыз.
Биылдан бастап жалпыға бірдей тегін кәсіптік білім беру жобасы жүзеге асырылуда. Бұл – өте орынды әрі дер кезінде қолға алынған бастама. Сұранысы жоғары, аса қажет мамандарды оқытып, қайта дайындау ісіне ерекше басымдық берілетін болса, ел экономикасының дамуына оң ықпалын тигізбей қоймайды. Осы орайда алдымен елімізде тапшы мамандықтар бойынша мамандарды дайындауда жергілікті билік кәсіпорындар және кәсіпкерлермен бірлескен іс-қимыл жасауы – кезек күттірмейтін мәселе. Әлеуметтік инфрақұрылым нысандарына жататын білім беру саласына қатысты өзекті мәселелер оңтайлы шешім тапса, белгіленген міндеттер тиянақты орындалып, ортақ істе жауапкершілік арттырылса, бірлік пен татулықты ту еткен халқымыздың алмайтын асуы болмайды.
«Мемлекет құру жолында теңдессіз, мол тәжірибе жинап, жаңа кезеңге қадам басып отырмыз. Алдымызда қандай қиындықтар кездессе де, оларды еңсере алатынымызға сенімдімін. Біздің басты күшіміз – бірлікте», деп айтылған Жолдаудың соңындағы осы бір ауыз сөз бейбітшілік пен достықтың, ауызбіршілік пен татулықтың Тәуелсіз Қазақстанға алып келген шарапатын ұқтыра түседі. Елдің баянды болашағы мен ертеңі үшін барлық қазақстандық жұдырықтай жұмылып қызмет атқарса, елдің бұғанасы одан сайын қатая беретіні анық.
«Қазақстандағы салалық білім және ғылым қызметкерлері кәсіптік одағы» ҚБ сала қызметкерлерінің әлеуметтік-экономикалық құқықтарын қорғай отырып, туындаған еңбек дауларын дер кезінде еңбек ұжымдарында шешуге, осылайша ел бірлігі мен тыныштығын сақтауға баса назар аударып келеді.
Мемлекетті жаңғырту басымдықтары білім беру саласына артылған үміт пен сенімнің, жауапкершіліктің талабы жоғары екенін білдіреді. Ел үдесінен шығу жолында Қазақстандағы ең ірі қоғамдық ұйым ретінде «Қазақстандағы салалық білім және ғылым қызметкерлері кәсіптік одағы» ҚБ өзінің әлеуметтік әріптесі болып табылатын Білім және ғылым министрлігімен бірлесе отырып, халықтың білім сапасын көтеру, ұстаздардың мәртебесін арттыру сынды көкейкесті мәселелердің шешімін іздестіру жолында еңбек етуде.
Мемлекеттің қуаттылығы халықтың білім деңгейі мен денсаулық жағдайына байланысты өлшенеді. Ғалымды да, инженерді де, дәрігерді де алғашқы кезеңде білім нәрімен сусындатқан ұстаздар қауымы екенін ешкім жоққа шығара алмайды. Адами капиталдың сапасын арттырудың негізгі бастауы да білім беру ісінің негізінде жатқанына салмақты түрде назар аударуымыз керек. Бұл сапа көрсеткішінің артуы тікелей ұстаздар қызметімен байланысты екенін аңғартады.
Қоғам алдындағы мұғалім мәртебесі мен олардың әлеуметтік-экономикалық әл-ауқаты қазіргі деңгейден де жақсара түсетін болса, адам капиталының сапасы да жоғары нәтижелерден көрінеді. Осы орайда қоғамымызда ұстаздарға артылатын жүк те, сенім де салмақты. Ұстаз мәртебесінің жоғары болуы – білім сапасын арттырудың бірден-бір кепілі. Оған бүкіл қоғам болып атсалысу керек. Бұл дегеніміз, ел мерейінің биіктеуіне, болашақ ұрпақтың саналы тәрбие алуына, өрендердің ел патриоты болуына тікелей оң ықпалын тигізеді. Елдің түрлі саласын жоғары деңгейге көтеру үшін кез келген адам өзінің жұмыс орнында, отбасында оған атсалысуы керек.
Майра АМАНТАЕВА,
«Қазақстандағы салалық білім және ғылым қызметкерлері кәсіптік одағы» ҚБ төрайымы, Қазақстан Республикасының еңбек сіңірген қызметкері
