Елбасы Нұрсұлтан Назарбаев биылғы Жолдауында «ағылшын тілі – жаңа технология, жаңа индустрия, жаңа экономика тілі. Ағылшын тілін меңгермей, Қазақстан жалпыұлттық прогреске жете алмайды», деп дүние жүзіне құлашын кең жайған тілді үйренудің маңыздылығын айрықша атап өткен еді.
– Біз ең әуелі оқушылардың ата-аналары арасында сауалнама ұйымдастырып, «егер біз мектепте ағылшын тілінен тегін курс ашатын болсақ, келесіздер ме?» деген сұрақ қойдық. Ата-аналардың 90 пайызы келеміз деп жауап берді. Уақыт жағын да сауалнама арқылы анықтадық. Сөйтіп, кешкі сағат 6 мен 7-нің арасында ағылшын тілінен тегін курс өткіземіз деп келістік. Міне, бір айдай уақыт болып қалды. Қазір екі тобымыз бар. Біздің бұл курсты ашудағы мақсатымыз – бала мектепте үйренген нәрсесін үйде де жалғастырса, әрі қарай тереңдетсе, дамытса дейміз. Өкінішке қарай, ата-аналардың 56 пайызы ағылшын тілінен балаларына көмектесе алмайды екен. Өйткені, ағылшын тілін білмейді. Сондықтан оқушының әке-шешесінің тіл үйренгенінен ұтпасақ, ұтылмайтынымыз анық, – дейді мектеп-лицейдің директоры Селман Шимшек.
Оның айтуынша, бұл бастама оқушылардың тіл білу деңгейін көтеріп қана қоймайды, олардың ата-анасымен арадағы қарым-қатынасты күшейтуге ықпал етеді, бір-біріне жақындастыра түседі. Өйткені, қазіргі қоғамда ата-ана мен оқушы арасындағы байланыстың әлсіреп бара жатқаны белгілі. Кейбір ата-аналардың баласынан гөрі ғаламтор мен ұялы телефонға көбірек көңіл бөлетіні жайында да аз айтылып жүрген жоқ.
Бұл мектептің оқушыларына да, олардың ата-аналарына да ағылшын тілін үйретіп жүрген мұғалімнің аты – Ровена Габут. Филиппин елінен келіпті.
– «Сен не қазақ тілін, не орыс тілін дұрыс білмейсің. Ата-аналарға ағылшын тілін қалай үйретіп жатырсың?» деп сұрайды менен бәрі. Таңғалады. Бірақ үйретіп жатырмын. Тәжірибе жүзінде үйретіп жатырмын. Ең бастысы, оқушыларыма бұрынғыдан гөрі бір табан жақындай түскендей болдым. Өйткені, олардың ата-анасын таныдым. Шәкірттеріме үйде ағылшын тілін үйрететін, сөйлесетін адам табылғанына, берген білімімнің далаға кетпейтініне қуанып отырмын. Ата-аналар да жақсы қабылдап жатыр. Ақырындап сөйлем құрауды үйреніп келеді, – дейді ол.
– Жасыратын несі бар, балаларымызға басқа пәндерден көмектесіп жүргенімізбен ағылшын тіліне келгенде ат-тонымызды ала қашатын едік. Енді міне, өзіміздің де үйреніп жатқан жайымыз бар. Баламмен ағылшынша сөйлескім келеді. Сабақтың уақыты да қолайлы. Кешке жақын балаңды мектептен алуға келгенде бір сағатыңды ағылшынша үйренуге арнағанның артығы жоқ деп ойлаймын, – дейді тегін курсқа қатысып жүрген ата-ананың бірі Гүлмира Шәріпханова.
Мектепте жаңа оқу жылынан бастап оқушылардың ойлау, тез шешім қабылдау, сабыр сақтау секілді қабілеттерін жетілдіру мақсатында «Интеллектум» атты екі кабинет ашылыпты. Аптасына бір мәрте жүргізілетін пән оқу бағдарламасына да енгізілген. Шығыс Қазақстан мектептерінде алғаш рет қолға алынып отырған бұл жобаға облыстық білім басқармасы қолдау білдіріп, Өскемендегі «Үміт» балалар үйі мен жуықта ғана мүмкіндігі шектеулі балаларға арналып ашылған «Ақниет» интернат-мектебінде де осындай екі кабинет ашты. Бұл пәнді әзірге 1-6 сынып оқушылары оқып жатыр. Келешекте жоғары сынып оқушыларын оқыту да жоспарланып отыр.
Азамат ҚАСЫМ, «Егемен Қазақстан»
ӨСКЕМЕН
