Қаулыға сәйкес, Украинаның көрмеге қатысуы мен дайындығын қамтамасыз ету мақсатында Үйлестіруші комитет құрылды, оның төрағасы болып Вице-премьер – Өңірлік даму, құрылыс және тұрғын үй-коммуналдық шаруашылығы жөніндегі министр Генадий Зубко тағайындалды. Ал кеше елордада Украинаның Қазақстандағы елшілігінде Украина істері жөніндегі уақытша сенім білдірілген өкіл Володымыр Джиджора журналистерге арнайы брифинг өткізіп, өз елінің биыл Астанада өтетін ауқымды көрмеге дайындығы жөнінде жан-жақты әңгімелеп берді.
Оның айтуынша, әлемнің басқа да елдері секілді Украинаның да бұл маңызды шараға дайындық жұмыстары қызу жүргізіліп жатқан көрінеді. «Біз өз мемлекетіміздің атынан Қазақстанға ЭКСПО-2017 халықаралық көрмесіне қатысуымызға қолдау көрсетіп, көмек қолын созғаны үшін ризашылығымызды білдіреміз. Себебі, өздеріңіз білетіндей, елімізде күрделі жағдай қалыптасқан. Сондықтан, қазақстандық тарап біздің мемлекетке арнайы павильон бөліп, үлкен көрмеге тегін қатысуымызға мүмкіндік беретін ортақ шешімге қол жеткіздік. Жалпы, Қазақстан бізден бөлек, онға жуық елге дәл осындай жағдай жасап отыр екен. Қазір Украинаның павильонын құруға «Астана ЭКСПО-2017» ұлттық компаниясы септігін тигізуде. Павильонды дайындау, құру, безендіру, дизайнын жасау жұмыстарын біз Қазақстандағы достарымызбен бірлесе қолға алып жатырмыз», – деді В. Джиджора.
Сондай-ақ, ол қазіргі таңда Украинаның ұлттық павильонын дайындау және көрме аясында бұл елдің Ұлттық күнін ұйымдастыру бағытында ауқымды жұмыстар атқарыла бастағанын жеткізді. Оның сөзіне қарағанда, Украинаның Ұлттық күнін өткізу 15 маусымға жоспарланып отыр екен. Ал бұл күннің ашылуына Украинаның Премьер-министрі В.Гройсман бастаған делегациясы арнайы келмек.
Сонымен қатар, ол Украинаның ұлттық павильонының аумағы шағын болғандықтан, онда негізінен медиа таныстырылым өтетініне тоқталды. «Біз көрмеге қандай да бір құрылғыларды, я болмаса тетіктерді әкелмейміз. Ал медиа таныстырылым шеңберінде көрмеге қатысуға келген Украинаның мемлекеттік және жекеменшік компанияларының өкілдері еліміздің мүмкіндігін, оның ішінде жаңартылған энергия көздеріне қатысты қол жеткізген жетістіктерімізді барынша көрсетуге күш салатын болады. Алдын ала айтатын болсам, ауқымды шараға ондаған компания қатысуға ынта-ниет танытып отыр», – деді Украина істері жөніндегі уақытша сенім білдірілген өкіл.
Сонымен, ЭКСПО-2017 көрмесіне қатысатын компаниялар ішінде «ДТЭК», «Фурлендер Виндтехнолоджи», «SYNEKO», «SolarGaps» секілді Украинаның жетекші әрі жекеменшік компаниялары бар.
Ләйла ЕДІЛҚЫЗЫ, «Егемен Қазақстан»
