Владимир Фоостың хабардар етуінше, сайлау заңнамасына сәйкес республиканың 12 өңірінде мәслихаттардың шығып қалған депутаттарының орнына 57 депутатты сайлау болды. Сайлауды ұйымдастыру мен өткізуге 13 облыстық, 9 қалалық, 36 аудандық, 58 округтік, 355 учаскелік сайлау комиссиясы жұмылдырылған. Науқан барысында барлығы 201 кандидат ұсынылды. Олардың 50-і облыстық, 32-сі қалалық және 119-ы аудандық мәслихаттарға дауысқа түскен. Үміткерлердің 62-сін саяси партиялар, ал 139-ы өзін өзі ұсынған.
«Округтік сайлау комиссиялары мәслихаттардың депутаттығына кандидаттар ретінде 188 адамды тіркеді, − деді ОСК төрағасының орынбасары. − Сайлау бюллетеньдеріне 170 кандидаттың тегі енгізілді, депутаттық мандатқа орташа бәсекелестік шамамен үш үміткерден болды, 330 сайлау учаскесінде дауыс беру өткізілді. Сайлаушылардың келуі 77,83 пайызды құрады. Дауыс беру қорытындыларына сай 12 облыстық, 9 қалалық және 36 аудандық мәслихат депутаты сайланды».
Орталық сайлау комиссиясының мүшесі Ләззат Сүлейменнің айтуынша, дауыс беру барысы мен дауыстарды санау рәсімін байқауды кандидаттардың 398 сенім білдірген адамы, саяси партиялардың – 289, қоғамдық бірлестіктердің – 34 және БАҚ-тардың 51 өкілі жүзеге асырған. Сайланған мәслихаттар депутаттарының құрамында 46 ер адам және 11 әйел бар. Орташа жастары – 46,5. «Ең жас депутат (22 жас) Қарағанды облысының Бұқар жырау ауданы №1 сайлау округінде, ең үлкені (64 жас) Тараз қаласы мәслихатының №22 сайлау округінде сайланды. Сайланған депутаттардың 54-інің жоғары білімі, 3-еуінің арнаулы орта білімі бар. Сайлау науқаны сайлау заңнамасы нормаларының талаптарына сәйкес өтті. Сайлау кезінде Ортсайлаукомға 3 өтініш келіп түсті», − деді Л.Сүлеймен.
Брифинг өткізушілер бір округте не себептен сайлау өтпегенін де айтып берді. Олардың сөздеріне қарағанда Оңтүстік Қазақстан облысының №11 сайлау округі бойынша мәслихаттың шығып қалған депутатының орнына өтетін сайлауда бір кандидат қана қалды. Сайлау заңнамасының кемінде 2 кандидаттың бәсекелестігі қағидатының сақталуына байланысты аталған округте сайлау болған жоқ. Бұл округте сайлауды өткізу туралы шешім республиканың сайлау заңнамасының талаптарына сәйкес қабылданады.
Әлисұлтан ҚҰЛАНБАЙ, «Егемен Қазақстан»
