Наурыз тек белгілі күндерде ғана тойланатын мереке емес. Ай бойы атап өтсең де артық етпейтін айтулы думан. Бүгінгі шараның мақсаты наурыздың қадір-қасиетін ұғынып, ұлық мерекенің даңқын әспеттеуге арналды. Тамыры тереңде жатқан түбі бір түркі халықтарына ортақ мерекенің артықшылықтары жайлы кеңінен айтылды. Бүкіл Жер-Ананы бусандырып әлемге шуақ сыйлайтын, жан біткенді жадыратып жаныңа шұғыла құятын шуақты шақтың әдемі көрінісі шара барысында оқылған баяндамаларда кең мазмұнда көрініс тапты.
Қазақстан халқы Ассамблеясының атынан жиылған қауымды құттықтаған Парламент Мәжілісінің депутаты Ахмет Мурадов: «Наурыз күн мен түн теңелген, береке мен бірлікті нығайтатын ұлы мереке. Оның өткені мен бүгінін, өміріміздегі маңызы мен артықшылықтарын жас ұрпақтың санасына сіңдіріп, келешек жастарға үлгі ету – бәріміздің міндетіміз. Әрбіріміз бұл күнді ерекше күтеміз. Бейбітшілік пен татулықтың арқасында осындай күнге жетіп отырмыз», деді.
– Біз үшін бұл күнді ерекше атап өту үлкен мәнге ие. Бір дастарқаннан дәм татып, араздасқан жандар татуласып бақ-ырысқа кенелетін бұл мейрам – баршамыздың ортақ құндылығымыз. Айтулы мереке еліміздің әр аймағында атап өтілуде. Жастарымыздың салт-дәстүрді құрметтеп, осы мереке арқылы татулық қарым-қатынасты нығайтып бауырласуы үшін бұл күннің маңызы зор, – деді Ұйғыр этномәдени орталығы басшысының орынбасары Сүлейман Максутов.
Шара аясында «Қазақстан ұйғырлары этномәдени орталығы» мүшелері суретшілерінің көрмесі тамашаланып, ұйғыр халқының ұлттық тағамдарына толы дастарқан жайылды. Іс-шараның соңы «Қош келдің, әз-Наурыз» деп аталған мерекелік концертке ұласып, ұлттық спорт ойындары ойнатылды.
Арман ОКТЯБРЬ,
«Егемен Қазақстан»
АЛМАТЫ
