«Өздеріңізге белгілі жер саласында туындаған сұрақтар бойынша арнайы комиссия жұмыс жасаған болатын. Қоғамдық пікірлерді саралай келе Жер реформасы бойынша комиссияның жер заңнамасын жетілдіру жөніндегі дайындалған ұсыныстарына сәйкес, Жер кодексіне келесі өзгерістер мен толықтырулар енгізу қарастырылады. Олар – қазақстандықтарға ауылшаруашылық жерлерін жалға беру институтын сақтау және жетілдіру. Қазақстандықтарға жалға берілетін ауылшаруашылық жерлерінің шекті (ең жоғары) мөлшерін белгілеу. Естеріңізде болса, бізде ауылшаруашылық жерлерін жалға беруде шектеу болмаған. Қазіргі таңда бұл көтеріліп отырған аса маңызды мәселелердің бірі болып табылады. Сонымен қатар, шекара маңындағы аймақтарда ауылшаруашылық жерлерін берудің талаптарын қатаңдату. Және де, халықтың қажеттіліктерін қанағаттандыру үшін елді мекендер маңындағы жайылым алаңдарын анықтау. Аталған ұсыныстарды ескере келе Ауыл шаруашылығы министрлігі заң жобасын әзірлеп, Мәжіліске ұсынған болатын. Ол қазір жан-жақты талқылануда.
Сонымен қатар ол, Жер кодексіндегі тәртіпке сәйкес ауыл шаруашылығындағы жерлерді беру конкурстық негізде жүзеге асырылатынын тілге тиек етті.
«Конкурсты өткізу туралы хабарламаны бұқаралық ақпарат құралдарында, әкімдіктердің және Ауыл шаруашылығы министрлігінің ресми интернет-ресурстарында жариялайтын боламыз. Ол үшін ең бірінші жер учаскелерін анықтап алып, конкурсқа қоюдың алдында, қоғамдық кеңестің келісіміне жібереді. Олар жерлердің қайсысы конкурсқа шығарылатынын, қайсысы халыққа қажет екенін анықтайды. Оның схемасын жергілікті атқарушы органдар жасайтын болады. Жоғарыда атап өткен конкурстың комиссия құрамының 50 пайыздан астамын қоғамдық кеңестің мүшелері құрайтын болады. Олар жыл сайын жаңарып отырады. Және де, берілетін жерлердің ұтымды пайдаланылуын тексеру мақсатында, заң жобасымен тұрақты мониторинг жүргізу қарастырылып отыр. Жалға алудың алғашқы 5 жылында – жыл сайын, келесі кезеңдерде суармалы жерлерге әрбір 3 жылда, егістік жерлерге әр 5 жылда бір рет мониторинг жүргізіледі», деді ол.
Рауан ҚАЙДАР,
«Егемен Қазақстан»
