Мұндай тығырыққа тірелудің негізінен екі себебі бар. Біріншіден, электр энергиясы, жылу, техникалық және ыстық судың Ұлттық экономика министрлігінің Табиғи монополияларды реттеу, бәсекелестікті және тұтынушылар құқығын қорғау комитеті 2015 жылы бекіткен тарифтерінің төмендігі. Екіншіден, кәсіпорынның өндіретін өнімінің өзіндік құнының 60 пайызын құрайтын газ шығынының 2015-2016 жылдарда 29 пайызға артқандығы.
Міне, осы факторлар кәсіпорынның қаржылық жағдайын мүшкіл халге жеткізіп, жоспарланған жөндеу жұмыстарын жасауға, энергия ресурстарын өндіруді азайтуға және т.б. қиыншылықтарға тіреп тұр. Осы мәселелерді ескеріп мен кәсіпорын басшыларының өтінішімен Премьер-Министрдің атына депутаттық сауал жолдап, МАЭК-тің жағдайын жақсарту жолдарын ұсындым. Оның ішінде «Табиғи монополиялар туралы» Заңның 13-бабының 3-тармағындағы стратегиялық тауарлар деген тізімді «өзі өндіретін су» деген сөздермен толықтыру керек екендігін айттым. Өйткені, заңның редакциясында «сатып алынатын су» деген сөздер ғана жазылған. Ал біз сөз етіп отырған кәсіпорын суды сатып алмайды, өзі өндіреді. Сондай-ақ, заңның 1.2-тармағына «электр энергиясы» деген сөзді қосуды ұсындық. Заңға осындай өзгерістер енгізілсе аталған кәсіпорынды оңалту шаралары жасалар еді. Сонымен қатар, Премьер-Министрден МАЭК үшін жылу энергиясын өндіру ғана емес су, электр мен жылу энергиясын өндіруге бөлінетін газ тарифінің де жеңілдетілуі өтінілді. Осы өнімдер тарифтерінің өзгеруі жылдың бір мезгілінде жасалатын болса тиімді болар еді. Ал егер газ тарифі 1 шілдеден бастап көтерілетін жағдайда МАЭК өзі өндіретін электр қуатының бағасын тек келесі жылдың 1 қаңтарынан бастап қана көтере алады.
Осы мәселелерге Үкімет басшысы назар аударып, өңірдегі электр және басқа да ресурстар өндіретін кәсіпорынды тығырықтан құтқарар деген үмітіміз бар.
Бақтыбай ШЕЛПЕКОВ,
Сенат депутаты
