«Smart Start» жобасын іске қосу және жоба тәлімгерлерімен танысу салтанаты «Зерде» Ұлттық инфокоммуникациялық холдингінде өтті. Мемлекеттік органдардағы сәулет блогы мен жобалық офис қызметі туралы баяндаған холдингтің басқарушы директоры Динара Щеглова өз тәжірибесімен бөлісті.
Алматы, Қарағанды, Ақтөбе, Астана, Семей қалаларында инфокоммуникациялық технологиялар мамандығында оқып жатқан студенттер мен бітірушілер жобаға қатысу үшін арнайы іріктеуден өткен. Тәжірибеден өтуге келгендердің бірі – әл-Фараби атындағы Қазақ ұлттық университетінің ақпараттық жүйелер магистрі Жақсылық Дүйсенбекұлы. Ол жобаға қатысу үшін инфокоммуникациялық технологияларды дамыту тақырыбында эссе жазғанын айтады.
"Қазір тұтыну заттарына интернет арқылы тапсырыс беру, әлеуметтік, медициналық қызметтерді онлайн арқылы атқаруда инфокоммуникациялық технологияның маңызы өте жоғары. Ұлттық компанияларда тәжірибеден өту арқылы жобалық офис қызметі туралы көп нәрсемен танысуға болады", дейді ол.
Аталған жобаға іріктеу биыл наурыз айында басталған. «Зерде» Ұлттық инфокоммуникациялық холдингі» басқарма төрағасының орынбасары Жарқынбек Азаматовтың айтуынша, өндірістік тәжірибеден өтуге ынталы студенттердің жас ерекшелігіне шектеу қойылған жоқ. Болашақта жоба жалғасуы мүмкін.
«Әзірге 10 студентті ғана таңдап алдық. Жобаны жалғастыру немесе тоқтату ісін алдағы уақытта нәтижеге қарай ойластыратын боламыз. Қазір жұмыс берушілер студенттерден тәжірибе талап етеді. Оқуды енді бітірген студентте тәжірибе қайдан болсын? Осы олқылықтың орнын толтыру мақсатында осындай бір жобаны қолға алдық», дейді басқарма төрағасының орынбасары.
Ая ӨМІРТАЙ,
«Егемен Қазақстан»
