Ақылбек Камалдинов ауғанстандық әріптестеріне Қазақстандағы саяси және әлеуметтік-экономикалық жаңғырулар туралы, Елбасының Жолдауы жөнінде баяндап берді. Ол елімізде өткізілетін халықаралық шараларға, атап айтқанда, Шанхай ынтымақтастық ұйымының саммиті, Ислам ынтымақтастығы ұйымы, ЭКСПО-2017 сынды шараларға Ауғанстанның қатысуы маңызды екенін айтты. Ыстанбұл процесі, Ауғанстан бойынша аймақтық экономикалық ынтымақтастық, БҰҰ-ның Орталық Азия экономикасына арналған бағдарламасы сынды Ауғанстанға қатысы бар көптеген халықаралық және аймақтық бағдарламаларға еліміздің белсене қатысып жатқанына да тоқталды.
Өз кезегінде, Хекмат Халил Карзай Қазақстанның БҰҰ Қауіпсіздік Кеңесінің тұрақты емес мүшесі болып сайлануына орай құттықтауын жеткізді. Ол осы сайлауда Ауғанстанның еш ойланбастан Қазақстан үшін дауыс бергенін, алдағы уақытта еліміздің Қауіпсіздік Кеңесіндегі бастамалары мен жұмысын қолдауға әзір екенін айтты.
– Біз Қазақстанның Ауғанстанға көрсеткен көмектері үшін алғыс білдіреміз. Ауған елі қиындыққа ұшырағанда сіздер демеу болып, қалыптасқан проблемаларды шешуге көмек бердіңіздер. Сіздер ауған жастарына көптеген стипендия тағайындап, Қазақстанның бетке ұстар оқу орындарында білім алуына жағдай жасадыңыздар. Ауған жастары түрлі ғылым салалары бойынша сапалы білім алуда, олар күні ертең өз елін алға сүйрейді деп сенемін, – деді Хекмат Халил Карзай.
Айта кетейік, 2009 жылы Қазақстан Мемлекеттік білім беру бағдарламасының аясында ауғанстандық мың студентке біздің елімізде жоғары және орта-техникалық білім алуға жағдай жасалған болатын. Сондай-ақ, сол елде әлеуметтік маңызы бар инфрақұрылымдарды қалпына келтіру үшін гуманитарлық көмек көрсеткен еді.
Хекмат Халил Карзай Қазақстанның 2 миллион доллар инвестициясы үшін алғыс білдіріп, бұл қаржы біраз мәселені шешуге көмектескенін айтты. Оның айтуынша, Ауғанстанның Ұлттық бірлік үкіметі елдегі ахуалды тұрақтандыру үшін барлық күш-жігерін жұмсауда.
Консультация кезінде тараптар Ауғанстан Ислам Республикасының президенті Мохаммад Ашраф Ганидің 2015 жылы Қазақстанға жасаған ресми сапары аясында қол жеткізілген келісімдердің жүзеге асырылу барысын талқылады. Халықаралық күн тәртібінде тұрған өзге де өзекті мәселелер бойынша өзара пікір алмасты.
Арнұр АСҚАР,
«Егемен Қазақстан»
