Екі жарым мың жыл бұрынғы оқиғаны жаңғыртып, аты аңызға айналған таңғажайып Тұмардың өз халқының бостандығы үшін күрескен ерлігі мен әйелге тән махаббатын өнер тілімен сөйлету оңай шаруа емес. Міне, енді Мәдениет және спорт министрлігінің тапсырысы бойынша Ш.Айманов атындағы «Қазақфильм» АҚ «Сатайфильм» киностудиясымен бірлесе отырып, биылғы жылдың ең ірі жобасы – «Тұмар» атты тарихи жобаның түсірілімін қолға алып, дайындық жұмыстарын бастап та кетті.
Бұған дейін «Рэкетир», «Адасқандар», «Ликвидатор», «Жаужүрек мың бала» атты фильмдерді сәтті түсіріп, «Анаға апарар жол» туындысын Әлия Назарбаевамен бірге шығармашылық бірлікте жүзеге асырған режиссер Ақан Сатаевтың «Тұмар» туралы туындысы тағы да екі жақты жауапкершілікпен атқарылмақ.
– Бұл ауқымды жобаның авторы – Әлия Нұрсұлтанқызы. Өздеріңізге белгілі, «Анаға апарар жол» фильмінде бірлесіп, табысты жұмыс жасадық. Енді, міне, мен және менің түсіру тобым аса қызығушылықпен және үлкен жауапкершілікпен осы тарихи жобаға кіріскелі отырмыз. Бүгінгі күні тарихи материалдармен танысып, сценарийді жазу және талдау, жобаның өндірісін жоспарлау, түсіру тобын құру, ғалым-кеңесшілерді жобаға тарту, алдын ала түсірілім локацияларын таңдау сияқты дайындық жұмыстары жүргізілуде, – деді Ақан Сатаев.
Режиссер жақын күндері республикалық кастинг жарияланатынын хабарлады. Фильм түсірілімі басталмай тұрып, барлық актерлер қару-жарақ асынып, атқа жайдақ мініп, садақ тартып, соғыс өнерінен сауаттарын ашу үшін алдын ала дайындықтан өтетін болады. Фильм түсіру жұмысы биылғы жылдың қазан айында басталып, 2018 жылдың ақпанына дейін жалғасады. Кинотуындының сценарийін жазуды Әлия Назарбаева мен Тимур Жақсылықов қолға алған. Айта кетсек, түсіру жұмыстарына еліміздің алдыңғы қатардағы кино мамандары қатысады, сонымен қатар, шетелдік мамандар, оның ішінде скрипт-доктор және компьютерлік графика шеберлері жұмылдырылатын болады.
Айгүл АХАНБАЙҚЫЗЫ,
«Егемен Қазақстан»
АЛМАТЫ
