Мал бағатындар үшін малдың етін өткізу қиынның қиыны. Ал, қаладағылар болса ақ-адал жолмен бауыздалған, күйлі де сау малдың етін алғысы келетіні белгілі. Ақтауда осы екі қажеттілікті өтей алатын жаңа қызмет түрі пайда болды. Ол «Қазақы ет орталығы» деп аталатын орын. Мал арнайы халал жолымен сойылып, ғұсыл дәретпен, басына орамал таққан қыз-келіншектер пісірген етке сұраныс та көп екен. Кіреберісте қолға су құйылып, сүлгі ұсынылып, табақты келіндер сәлем салып алуының өзі қазақы ортаға қызығушылықты арттыра түседі. Тіпті, қазы-қарта, жал-жаясымен, қолдан дайындалған нан салған етті астырып, үй-үйге тапсырыспен алдыратындар қатары көбейген. Бизнесін дамытып, әрі ұлттық асты насихаттауды қолға алған кәсіпкерлер сұраныстың көп екендігін, қазақтың ет асу өнерін және әрбір қазақ сүйіп жейтін етті ұлттық брендке айналдыруды мақсат етіп отыр. Орталыққа келген қонақтар, әсіресе, шетелдіктер қазақтың ет тағамын жеумен бірге, ұлтымыздың салт-дәстүрімен, ән-күй, жыр-терме тыңдап, қазақтың мәдениетімен таныса түсетін болады.
Орталықтан сүрленген ет, жаңа сойылған малдың еті, қой, сиыр, жылқы, түйе еті, қуырдақ және оның түрлері, қазы-қарта, жал-жая, бұжы, шұжық – барлығын табуға болады. Тұрғындардың бірқатары қазақтың ұлттық тағамын насихаттауда ұтымды жол десе, енді біреулері етті үйге асып әкеліп берсе, келіндердің «қолы ұзарып, жасайтын жұмыс таппай қала ма?» деп алаңдаулы.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
