Дана Абайдың жұмбағы көп, сыры терең, мәні мәңгілік мұраларын зерттеуде ғұлама Мұхтар Әуезов көшін бастаған абайтанушылардың дәл қазіргі кезде белді де беделдісі, дәстүр жалғастығы мен көш тізгінін қолға алған Мекемтас Мырзахметұлы екендігі анық. «Абайтану тарихы» атты құнды еңбегінде ғалым абайтанудың тұтас картинасын жасайды.
Мекемтас Мырзахметұлының еңбектерінің ғылыми құндылығын оқырман қауымға кеңінен насихаттау үшін өткізілген конференцияны жазушы Мархабат Байғұт жүргізіп отырды.
«Абай жүрген ізбенен» атты конференцияда «Абайды Шығыспен байланыстыра зерттеуші – М.Мырзахметұлы», «Абайдың адамгершілік ілімі – М.Мырзахметұлы зерттеулерінде», «Мекемтас ғылымының биігі», «Бауыржантану ғылымының негізін салушы» деген тақырыптар бойынша баяндамалар тыңдалды.
Конференция барысында қазақ ғылымының ірі тұлғасын сөзге тарттық.
− Түркістанда Ясауи атындағы ХҚТУ-дің қазығы қағылғаннан кейін университетке жұмысқа шақырылдым, – деді Мекемтас Мырзахметұлы. – Ректоратта менен Ясауи туралы сұрады, шынымды айтсам, өзім біліңкіремейді екенмін. Өйткені, Кеңес өкіметі қазақты біріктірмей, тоз-тоз ету үшін Ясауиды жамандап, мансұқтап тастаған. Кейін шәкірттеріммен толық зерттеп, кітабын шығардық. Байқағанымыз, Ясауи − қазақты ешқайда адастырмас темірқазығы екен. Ясауи мен Абай барда қазақ аман болады. Кейінгі ұрпақ осыны білуі керек.
Қазақ мүддесі үшін от пен суға түсіп, адалдығынан айнымайтын көрнекті ғалым осылай дейді.
Бақтияр ТАЙЖАН,
«Егемен Қазақстан»
Оңтүстік Қазақстан облысы
