Халықаралық «Жасыл көпір» экологиялық форумының қазылар алқасы Бектайырдың жұмысын жоғары бағалап, бірінші орынмен марапаттады. Ғылыми-зерттеу сайысында жеңімпаз атанған оқушы мектептегі роботты техника үйірмесіне қатысады. «Информатика мен химияны кіріктіру арқылы ортақ дүние жасап шығаруға болады, өйткені табиғаттағы және физикадағы кейбір құбылыстарды бөлек пән ретінде қарастыру қиын», дейді жобаның ғылыми жетекшісі Рақымжан Қосанов.
Қазіргі білім беру саясатының негізгі бағыты – STEM қағидалары арқылы бір мезгілде бірнеше пәнді кіріктіре оқыту. Сол арқылы ғылым, технология, инжиниринг және математиканы өзара сабақтастыру жолымен ғылыми прогреске тез жетуге болады. Атыраудағы Назарбаев зияткерлік мектебі бұл бағытта биіктерден көрініп жүр. Осы білім ордасының тағы бір талапты шәкірті – Жәнібек Мубинов Ресейдің Королев қаласында өткен олимпиадаға физика пәні бойынша қатысып, бірінші орынды жеңіп алды. Жәнібек қазақстандық KAZSAT-3 жасанды жерсерігін модельдеу бойынша жобасын қорғады. «Зымыранды ұшырған соң оны ғарыш кеңістігінде бақылау қиын. Жердегі мамандар бұл бағытта түрлі жетістіктерге және жаңашыл мүмкіндіктерге қол жеткізсе де, әлі де жер серіктерін тиянақты әрі тұрақты бақылап отыруға мүмкіндік беретін амалдар ойлап табылған жоқ», дейді Жәнібек. Ғылыми жобасында жер серіктердің ғарыш әлеміндегі жұмысын жан-жақты сипаттап берген. 200-ден астам дарынды бала қатысқан халықаралық сайыста атыраулық оқушының мерейі үстем болды.
Бақытгүл БАБАШ,
«Егемен Қазақстан»
АТЫРАУ