Жобаға инвестиция тартылды

Елбасының Жолдауында атап көрсетілген азық-түлік қауіп­сіз­ді­гін қамтамасыз ету тапсырмасы өңірде ұтымды қол­ға алынған. Оны Қап­ша­ғай қаласының шы­ғы­сын­да­ғы бел-белесті тегістеп, жы­лы­жай салуға кіріскен тех­ни­калардың қимылынан көруге болады. Жаңа технологияға сай жалпы аумағы 5,1 гектар жерге ірі нысан тұрғызуды жоспарлағандар оның көлемін 20 гектарға дейін арт­ты­руды мақсат етуде. Жоба мақсаты – жыл бойы тұтынушыларды эко­логиялық жағынан таза көкөніс өнімдерімен қамту, қызанақ шы­рыны мен қиярдың және түрлі салаттардың аудандастырылған нидерландылық «De Ruiter Seeds» гендік таза табиғи түрін өсіру, жылыжайда еңбек ететін кәсіби мамандар қатарын толықтыру. Қапшағайдағы осы жұмыс­тар­мен танысу үшін Ауыл ша­руашы­лы­ғы министрі Асылжан Мамыт­бе­ков өткен бейсенбіде осы істі бастаған ЖШС басшысы Алмас Дәуі­товтен өндірістің да­муы­на қа­тысты мәселелерді ор­та­ға салды. Се­ріктестік жылдың төрт мезгілінде күн сәулесі мо­лынан түсетін оң­тайлы осы мекенді таңдағаны әрі үлкен мегаполис қалаға өнімді та­сы­­мал­дау­ға қолайлы екендігін сөз етті. Жылыжайда қала базар­лары­на жөнелтетін көкөніс көлемі – жылы­на 1400 тонна томат, 2700 тонна қияр және 100 тонна салат өнімдері тұтынушылардың жоға­ры талғамы­нан шығатынына кү­мән жоқ. Се­ріктестіктің Алматы базарларын­да­ғы үлесін тоғыз пай­ызға жеткізу де алдағы басты міндет ретінде қа­ралу­да. Аталған жобаға 2 млрд. 411 млн. 489 мың теңге инвестиция тарту көздел­ген. Оның ішінде серік­тестіктің өз қаржысы 361 млн. 723 мың теңгені құраса, 2 млрд. 289 млн. 400 мың теңге Қазагроқаржы ар­қылы қаржыландырылады. Жылыжайдың жеке метео­стан­­сасы жабдықталып, элек­трон­ды-климатты бақылау авто­мат­­тан­дырылған жүйе бойынша жұмыс істемекші. Жылыжайдың ішкі аумағын жылыту мен сал­қын­дату да осы тәсілмен жүзеге аспақ. Өнімді өсіру барысында тыңайтқыш пен минералдар да автоматты түрде енгізіліп, там­шы­лата суару әдісімен жал­ға­са­ды. Өнімді сақтауға жоғары қы­сыммен тұман туындату жүйесі қолданы­лады деп жоспарланған. Іргелі істердің барлығына қа­жет­ті құрал-жабдықтарды Нидерлан­ды­ның «DALSEM» компаниясы жеткізген. Министр Шеңгелді алабын­да­ғы егістік алқаптарын аралап, там­шылата суару тәсілінің нақты нәтижелерімен танысты. Содан соң «Нұр Агро» және «Жетісу Агро» серіктестерінде болып, өн­дірістің бүгінгі бағытын бағалады. Облыста ауыл шаруашылығы әлеуетінің жоғары екендігі белгілі. Оның үстіне аймақтың ауыл ша­руа­шылығы өнімдеріне деген сұра­нысы жыл сайын арта түсуде. Шең­гелдідегі көкөніс сақтайтын қой­ма­ның тиімділігін пайдалану негізінде алдағы кезде шырын өндіретін зауыт салы­натынын да айтқан жөн. Халықты таза азық-түлікпен қамту – бүгінгі күннің өзекті мә­се­лесі. Әсіресе, егістік алқап­тары­ның тиімділігіне қол жеткізу қолға алынғаны қуантады. Өйт­кені, елімізде пайдаланылмай  жат­қан егістік жерлердің, әсіресе суармалы ал­қаптардың жеткілікті екені жасы­рын емес. Шаруалар алған жерлерін өңдеп, ел игілігіне ұсынса, құба-құп. Оған осы жол­ғы жұмыс бары­сында көз жетті. Күмісжан БАЙЖАН. Алматы облысы .