Сапалы заң – қоғам байлығы

 Ұлттық академиялық кітапханада мемлекеттік әлеуметтік тапсырыс мәселелерін заң жолымен жетілдіруге қатысты дөңгелек үстел болып өтті, деп хабарлады Парламент Мәжілісінің баспасөз қызметі. Дөңгелек үстелді Парламент Мә­жі­лісінің Әлеуметтік-мәдени даму комитеті, «Нұр Отан» ХДП-ның Парламент Мә­жілісі фракциясы жанындағы Қоғамдық ұйым­дар­мен байланыс жөніндегі кеңесі, Мәде­ниет министрлігі, «Қазақстанның аза­мат­тық Альянсы» ЗТБ ұйымдастырды. Бұл басқосуда «Қазақстан Республикасының кей­бір заңнамалық актілеріне мемлекеттік әлеуметтік тапсырыс мәселелері бойынша өзгерістер мен толықтырулар енгізу тура­лы» заң жобасы талқыға түсті. Осы шара Парламент Мәжілісінің негізгі іс-шаралар жоспарына сәйкес өткізілді. Отырысқа Парламент Мәжілісінің де­путаттары, «Нұр Отан» ХДП-ның Парламент Мәжілісіндегі фракциясы жанындағы Қоғамдық ұйымдармен байланыс жөнін­дегі кеңестің мүшелері, заң жобасы бой­ынша жұмыс тобының мүшелері, Мәжіліс Аппаратының өкілдері, заң жобасын әзір­леу­шілер – Мәдениет және Қаржы ми­нистрліктерінің жауапты қызметкерлері, үкіметтік емес ұйымдардың басшылары мен өкілдері қатысты. Басқосуды жүргізген Парламент Мә­жі­лісі Әлеуметтік-мәдени даму комитетінің төрайымы Динар Нөкетаева кіріспе сөз сөйледі. – Қазақстан Президентінің 2006 жылғы 25 шілдедегі Жарлығымен бекітілген Қа­зақстан Республикасында азаматтық қоғамды дамытудың 2006-2011 жылдарға арналған тұжырымдамасында «Yкіметтік емес ұйымдар сегментінде мемлекеттік әлеуметтік тапсырысты қалыптастыру тетігін жетілдіру мен оның ашықтығын қамтамасыз ету, оны іске асыру тетігі мен рәсімдерін жақсарту, YEҰ-ның басым әлеуметтік бағдарламалар мен жобаларды айқындауға қатысуы мәселелерін көздеу және Мемлекет пен YЕҰ-ның өзара іс-қимыл үдерісін тұтастай тереңдету, әсі­ресе, өңірлер мен ауылдық жерлерде YEҰ бөлігін дамытуды қолдаудың институттық және ұйымдық базасын нығайту қажет» деп атап көрсетілген, – деді Динар Нө­кетаева. – Бүгінгі таңда жалпы мемлекеттік әлеуметтік тапсырыс мәселелеріне қатысты жиналып қалған бірқатар проблемалар бар. Оның ішінде мемлекеттік әлеуметтік тапсырысты іске асырудың қолданыстағы тетіктерінің жетілмегендігі, оны жүзеге асыру барысында туындайтын қоғамдық қатынастар субъектілерінің қажеттіліктері мен олардың іс-әрекеттерін регламенттеу мәселелері, оның ішінде құқықтары мен міндеттерін айқындауы, мемлекеттік әлеу­­меттік тапсырысты орталық және жергілікті деңгейлердегі бөлу тәжірибесін кешенді зерттеу қорытындылары мен атал­ған мәселе бойынша қоғамдық пікірлерін айтуға болады. Сондықтан үкі­меттік емес ұйымдарды мемлекет тара­пынан қолдау жүйесін одан әрі жетілдіру, мемлекеттік тапсырысты іске асыруға бөлінетін бюджет қаражатын тиімді игеруге қоғамдық қатынастар субъек­тілерінің жауапкершілігін арттыру, мемлекеттік әлеуметтік тап­сырысты бөлуде мемлекеттік саясаттың басымдықтары мен республикадағы және жекелеген өңірлердегі әлеуметтік-эко­но­ми­калық даму қажеттіліктерін ескеру керек екендігі сөзсіз. Келесі кезекте Мәдениет министр­лігінің жауапты хатшысы Жанна Құрман­ғалиева баяндама жасады. Парламент Мәжілісінің депутаты аталған заң жобасы бойынша құрылған жұмыс тобының жетекшісі Гүлнар Сейітмағанбетова атқа­рылған жұмыстар мен талқылау барысы туралы айтып берді. Ал Парламент Мә­жілісінің депутаты, «Қазақстанның аза­мат­тық Альянсы» заңды тұлғалар бір­лес­тігінің президенті Айгүл Соловьева өз ұсы­ныстарын жеткізді. Сондай-ақ «АРГО» азаматтық қоғамды дамыту қауым­дастығы» ЗТБ директоры Жәмила Асанова өз пікірін білдірді. Қатысушылар пікірі дұрыс заң қабылдасақ, ол бәрімізге абырой әкеледі деген бір арнада тоғысты.