Өнер мектебі 2012 жылдан бастап тәрбиеленушілерінің жұмыстарын көрермен назарына ұсынып келеді. Бұл жолғы экспозицияға әрқилы мәнерде орындалған 76 жұмыс қойылған. Атап айтқанда, сұңғат, графика, линогравюра, батик, папье-маше, витраж, киіз басу сияқты небір қолөнер туындыларының озық үлгілері бар. Мұражайдың ғылыми-экспозиция бөлімінің жетекшісі Ирина Соловьеваның айтуынша, көрмеге ұсынылған дүниелер оқушылардың сабақта игеретін жұмыстарының біраз бөлігі ғана екен. Осынау алғашқы еңбектеріне қарап, олардың қоршаған ортаға деген құрметін аңғаруға болады. Оның үстіне жеке шығармашылықтың қалыптасуы бейнелеу өнерімен айналысу кезінде пайда болады екен. Малика Мусина, Айдана Алдоңғар сияқты талаптылар болашағынан үлкен үміт күттіреді. Ұйымдастырушылардың пікірінше, шығармашылықпен айналысу әр баланы қуаныш сезіміне бөлейді. Олар заттар мен құбылыс туралы ойланып, керекті әдістерін меңгеріп, бейнелеу өнерінің қыр-сыры туралы білім алатын болады.
Раушан НҰҒМАНБЕКОВА
СЕМЕЙ
Суреттерді түсірген автор
