Өйткені, әр адамның туған жері бар. Өмірдің өз тәжірибесі көрсеткендей, Президенттен бастап қарапайым жұмысшыға дейін Астанада немесе Алматыда тұрса да бір бүйрегі туған жеріне бұратыны шындық.
Бұрыннанда өз туған жерлеріне спорт алаңын, мешіт, мектеп, балабақша салып берген жомарт жандардың қатарында Н.Балғымбаев, Н.Сабильянов, ағайынды Байшолақов барын білетінмін. Алдағы уақытта Елбасының бағдарламалық мақаласында айтылған «Туған жер» бағдарламасына өз үлесін қосатын патриот жандар көбейері сөзсіз. Туған жеріне көмек қолын созып, ауылдастарының алғысын арқалайтын жандардың көп болуы елдіктің, бірліктің белгісін айқындайды.
Қарабау өңірі – тарихи-мәдени мекен. Біздің туған жерімізде де талай батырлар мен ақындардың ізі қалған, елдің көркеюіне үлес қосқан қоғам қайраткерлерінің қолтаңбасы бар. Ауыл көлеміндегі әр отбасында ұлттық құндылығымыздың куәсі болатын жәдігерлер табылатыны да шындық.
Ал қазіргі ұрпақтың көбінің жастықағаш, асадал, жүкаяқ, мосы, т.б. білмейтіндігі де мәлім.
Ғасырлар бойы халқымыздың кәдесіне жараған бұйымдарды, ұлт жәдігерлерін білмеу – үлкен сын. Сондықтан да әр ауылда өткенімізді еске түсіретін, ұлықтайтын музей ашылса, ұрпағымыздың ел тарихына, мәдениетіне, салт-дәстүріне қызығушылығы артып, қадір-қасиетін түсінері анық.
Гүлжан ТОҚМЫРЗИНА,
мұғалім
Атырау облысы,
Қызылқоға ауданы,
Қарабау ауылы
