Алматы бюджеті 8 миллиард теңгеге ұлғайды

Өткен апта соңында Алматыда қалалық мәс­лихаты ІV ша­қы­рылымының ХХХХV сессиясы өтіп, қаланың 2011-2013 жыл­дарға арналған  бюджеті жайлы мәселе қаралды. Мәслихат барысында Алматы қаласының экономика және бюд­жеттік жоспарлау басқарма­сы­ның бастығы Сардар Қабдолов қала­ның табысы 8 миллиард 132 958 мың теңгеге көбейгенін мә­лім­де­ді. Бұл қаражат қаланың ең басым бағыттағы шараларын жү­зеге асы­руға жұмсалады. Олар­дың қа­тарында білім ғи­ма­рат­та­рын жөн­деу, тұрғындарды әлеу­меттік жа­ғынан қамтамасыз етуді дамыту, тұрғын үй-коммуналдық шаруа­шылықтары, табиғатты пай­далану сияқты көптеген ны­сан­дар бар. Толайым алғанда,   2011 жыл­ғы қаланың нақтыланған жалпы бюджеті 309 миллиард 969 миллион 744 мың теңгеге жетті. Нақ­ты қолданыстағы бюджет 261 мил­лиард 329 миллион 835 мың тең­гені құрайды. Алматы қала­сы­ның әкімі Ахметжан Есімов қаланың өткен жылғы бюджеті 264 миллиард болғандығын еске салды. – Үстіміздегі жылы жергілікті бюджет 31,7 миллиард теңгеге өсті. Алдын ала мәліметтерге қарағанда, жарты жылдың ішінде қала өндірісі өткен жылғы осы кезеңмен салыстырғанда 20 пай­ызға көтерілді. Іскер орта жұмыс істеп жатыр, сондықтан да салық түсімі де көбеюде. Меніңше, бұл үдеріс сақталады. Осыған сәйкес, келесі жарты жылдықта түсетін пайда алдыңғы жарты жылдыққа қарағанда жоғары болады, – деді қала әкімі. Сондай-ақ, жиын ба­ры­сында мәслихат депутаттары «Бақай» шағын ауданының атын ауыстыру туралы ұсынысты ма­құл­дап, ол «Жас қанат» атанды. Айнаш ЕСАЛИ, Алматы.