Ұлы Жеңістің 72 жылдығын атап өтуге арналған жиынға Президент Әкімшілігінің, ел Үкіметінің, Парламент пен мемлекеттік органдардың, дипломатиялық корпустың өкілдері мен Астана қаласында тұратын майдангерлер және қала жұртшылығы қатысты.
Ұлы Жеңістің 72 жылдығын атап өтуге арналған жиынға Президент Әкімшілігінің, ел Үкіметінің, Парламент пен мемлекеттік органдардың, дипломатиялық корпустың өкілдері мен Астана қаласында тұратын майдангерлер және қала жұртшылығы қатысты.
Ресми рәсім аясында жалғасын тапқан салтанатты шара барысында Мемлекеттік күзет қызметінің Президенттік оркестрі еліміздің Әнұранын орындап, Құрмет қарауыл ротасы Жоғарғы Бас қолбасшының және Ұлы Отан соғысы ардагерлерінің алдында салтанатпен сап түзеп, жүріп өтті.
«Соғыс ардагерлері біздің бақытты өмірімізге, тәуелсіздігімізге және аспанымыздың ашық болуына жол ашты. Біз бүгін «Отан қорғаушылар» монументіне гүл шоғын қойып, халқымыздың майдандағы және тылдағы қаһармандығы мен еңбегіне деген зор құрметімізді білдіреміз», – деді Қазақстан Президенті.
Мемлекет басшысы Екінші дүниежүзілік соғыс адамзат тарихында ондаған миллион адамның өмірі қиылған ең қанқұйлы соғыс болғанын атап өтті.
«Қаза тапқандардың қатарында қазақстандықтар да болды. Республикамыздың 6 миллион халқының 20 пайызы майданға аттанды. Олардың жартысы қайта оралған жоқ», – деді Нұрсұлтан Назарбаев.
Елбасы Жеңістің Қазақстан тәуелсіздігі тарихындағы тағдыршешті рөліне тоқталып, оған ел халқының бірлігі арқасында қол жеткізілгенін де атап айтты.
«Біздің ардагерлерге деген құрметіміз олардың ерлігінен кем түспеуге тиіс. Жеңіске ең алдымен еліміздегі барлық халықтың бірлігінің, бауырмалдығының және достығының нәтижесінде қол жетті. Біз қазір де осы ұранмен өмір сүріп келеміз», – деді Президент.
Соғыс ардагерлеріне алғыс айтып, олардың жауға қарсы күресте көрсеткен ерлігі мен жанқиярлығын атап өткен Мемлекет басшысы барша қазақстандықты Жеңіс күнімен құттықтап, зор денсаулық және бақ-береке тіледі.
Салтанатты шара соңында Елбасы «Студенттер» саябағындағы шатырлар қалашығына барып, қарт майдангерлермен емен-жарқын әңгіме құрды. Жылдағы дәстүрге сай мұнда 11 әскери шатыр орнатылып, ардагерлер мен тыл еңбеккерлеріне арналған дастарқан жайылған болатын. Айта кетейік, бүгінгі таңда елордамыз – Астана қаласында Ұлы Отан соғысының 121 ардагері тұрады.
Нұрлыбек ДОСЫБАЙ,
«Егемен Қазақстан»
