Оқиға былай болған еді. Семей қаласындағы Береговая-72 мекенжайы бойынша су құбырларын қосатын камераның ішінде екі ер адам қондырғыларды газбен дәнекерлеп отырады. Кенет әлдебір ақау орын алып, ауа тарылып, газбен уланған, олардың тыныс алуы қиындай бастайды. Құдық ішінде жұмыс істеп отырған, олар шамалары келгенше көмекке шақырып, жан дауыстарымен айқайлайды. Дәл осы сәтте сол құбырдың қасынан Ержан Садықов өтіп бара жатқан еді. Көп ойланып, толғанбастан Ержан бірден көмекке ұмтылады. Дереу екі жігітке көмек көрсетіп, оларды құбырдан алып шығады. Сөйтіп, әлгі екі азаматқа дереу алғашқы медициналық жәрдем де көрсетеді. Оның бейбіт күндегі осы ерлігі туралы хабардар болған бөлім командирлері әскери қызметкерді марапатқа ұсынды. Ержан Садықовқа «Ерлігі үшін» медалі табысталып, төтенше жағдайды көрсеткен көмегі үшін Алғыс хатпен де марапаттады.
– Қазақстанда туып-өстім. Осындай елім болғанын мен мақтан тұтамын, – дейді Ержан Садықов. – «Отан – оттан да ыстық» деген, туып өскен, кіндік қаның тамған жерің, атамекеніңе жетер не бар?! Сол атамекеніңде өмір сүріп жатқан отандастарыңа қажет кезінде көмек қолын созу, әрине, басты парыз деп есептеймін. Адам өмірі қашан да қымбат. Өмірге ғашықтық – бұл адамның рухани деңгейінің биіктігін көрсетеді. Ержан Садықов шын мәнінде Отанына адал қызмет етуші, халықтың қалаулы азаматтарының бірі. Әрине, осындай ұлдары бар елдің еңсесі биік.
Раушан НҰҒМАНБЕКОВА
Семей
Суретті түсірген автор
