Павлодар облыстық дене шынықтыру және спорт басқармасының мәліметінше, биыл бұл жобалар қатарында Павлодардағы Усолка шағын ауданында халықаралық стандарттарға сай 300 орындық трибунасы бар 50 метрлік жүзу бассейнінің құрылысы басталады. Ал Баянауылда тау шаңғысы кешенінің жобасы әзірлік үстінде. Өңірде еркін күрес залдары жаңғыртылып, Павлодар, Екібастұз және Ақсу қалаларында 32 стрит-воркаут (street workout) жаттығу қондырғыларын және ойын алаңдарын орнату жоспарда бар. Жалғыз Баянауыл емес, өңірдегі әр ауданда спортқа ерекше көңіл бөлінуде. Сондықтан, облыстық әкімдікте өткен отырыста спортқа жауапты тұлғалар «Біздің өңір үшін 2017 жылды спорт жылы деп атауға болады», деп атап өтті.
ERG компаниясы мен облыс әкімдігі арасында жасалған меморандумға сәйкес, жергілікті дене шынықтыру және спорт басқармасы Баянауыл аудандық әкімдігінің «Ұлттық саябақ» басшылығымен бірлесіп, тау шаңғысы кешенін салу үшін жер телімін бөлу мәселесімен айналысуда. Сонымен қатар, жол, электр желісін тарту сияқты жұмыстар басталып та кеткен.
Басқарма жоба бойынша облыс орталығында 164 миллион теңгеге екі күрес залын қайта құруды жоспарлаған. Орталық жағажайда, сондай-ақ, қаладағы 33 тұрғын үйдің ауласында және Ақсудағы 10 алаңда воркаут құрылғыларын орнатпақшы. Бұл мақсатта «Самұрық-Қазына Траст» қорының қолдауымен өңірде пластиктен жасалған қоршаулары бар хоккей корты, күш жаттығу құрылғылары, шағын футбол, стрит-воркаут, стритбол алаңдары және балаларға арналған 10 инклюзивті, көп функциялы алаңқайлар орнатылады. Олардың сегізі – Павлодар, Екібастұз және Ақсу қалаларында орын теппекші.
– Сонымен бірге, биыл Қашыр ауданының орталығы Тереңкөлде, Ақсу қаласының Евгеньевка, Қызылжар ауылдарында дене шынықтыру-сауықтыру кешендері бой көтереді. Облыстың үш қаласында, сондай-ақ, Баянауыл ауылында 200 миллион теңгеге футбол алаңдары салынады. Мемлекет-жекеменшік әріптестік желісі бойынша облыс орталығында жабық футбол кешенінің құрылыс жұмыстары қолға алынады. Жуық арада оның эскиздік жобасы таныстырылатын болады, – дейді облыстық дене шынықтыру және спорт басқармасының басшысы Марат Айдашев.
Тағы бір жақсы жаңалық – енді қала тұрғындары мен қонақтар облыс орталығындағы Усолка өзенінде қайыққа мініп, ескек есетін болады. Өйткені, бұрын бұл жерде арнайы қайық базасы болған-ды. Ескек есу секциясы ашылмақшы. Қажетті құрал-жабдықты сатып алуға және өзен жағасында қайықтарды сақтауға арналған эллинг салуға конкурс жарияланып та қойыпты. Академиялық ескек есушілерді дайындайтын жаттықтырушылар да бұл іске жұмылдырылмақшы.
Фарида БЫҚАЙ,
«Егемен Қазақстан»
Павлодар облысы
