Он команда қатысқан тартыста теміртаулықтар бірінші орыннан көрінсе, ақжалдықтар мен астаналықтар мәреге үзеңгілес келді. Оларға осынау турнирді ұйымдастырушылар тарапынан ақшалай сыйлықтар берілді. Сонымен бірге, «Үздік шабуылшы», «Үздік қорғаушы» «Волейбол спортының ардагері» атанған Юрий Сенкевич, Азамат Балағазинов және Марат Оспановқа да сый-сияпат көрсетілді.
– Бұл жарыстың арқасында облысымызда волейбол спортын дамытуға үлкен қозғау салынып отыр. Әбдіханов атындағы турнирде танылған жігіттердің біразы таңдаулы командалар құрамына тартылып, халықаралық жарыстарда көзге түсіп жүр, – дейді жарыстың бас төрешісі Болат Дүйсебаев.
Осынау игілікті бастаманы көтеруші Әбдіхановтар әулеті жарыс аясын кеңейтуді ойлайды. Алдағы жылы республикалық біріншілікке ұластыру, Қарағанды аймағын волейбол спорты ордасына айналдыру негізгі мақсат. Өтуі бір түстік, есте қалуы бір күндік жиын-тойлардан гөрі мәні мен жөні бөлек осындай жарыстардың түр-түрін өзге де жанашырлар өрістете түссе, нұр үстіне нұр-ақ.
Айқын Несіпбай
ҚАРАҒАНДЫ
