Корея Президенті – Астананың құрметті азаматы

Кеше Мемлекет басшысы Нұрсұлтан Назарбаев елімізге ресми сапармен келген Корея Республикасының Пре­зиденті Ли Мён Бакке екі елдің дос­тық қарым-қатынасын ны­ғай­ту ісіне қосқан елеулі үлесі үшін «Астана қаласының құр­метті азаматы» атағын та­быс етті. Атақты тапсыру рәсімінде Астана қаласының әкімі И.Тас­мағамбетов мәртебелі мейманға атақты беру туралы шешімнің 2011 жылдың 19 тамызы күні қа­былданғанын атап өтті. Одан әрі ол Астананың даму деңгейі мен екі ел арасындағы достық және ынтымақтастығы туралы ойлары­мен бөлісті. «Біз сіздерді әр­қа­шан Отанымызда қарсы алуға қуа­ныштымыз. Астана – Отаны­мыздың жүрегі, Астана – тәуел­сіз­дігіміздің белгісі, Астана – ол посткеңестік кеңістіктегі ең әдемі, сәулеті мен дәулеті жарас­қан қала. Астана – Ұлт көш­бас­шысы, Президент Нұрсұлтан Назарбаевтың қаласы», – деді ол. Одан кейін қала әкімі екі ел президенттерінің достық қарым-қатынастарының арқасында Қа­зақ­стан мен Корея елдерінің саяси және экономикалық ынты­мақ­тастығы жылдан-жылға дамып, соңғы кездері екі елдің сауда айналымы артып келе жатқанын атап өтті. Ол қазір елімізде 300-ден астам бірлескен кәсіп­орын­дардың жұмыс істейтінін, соның нәтижесінде Қазақстанға Кореядан 4 млрд. АҚШ доллары кө­лемінде инвестиция тартыл­ға­нын жеткізді. Осыдан кейін салтанатты шарада Астана қаласы мәсли­хаты­ның хатшысы В.Редкокашин Корея Республикасының Президенті Ли Мён Бакке қаланың құр­метті азаматы атағын беру ту­ралы шешімді оқып бергеннен кейін, Елбасы Н.Назарбаев мәр­тебелі мейманға «Астана қала­сының құрметті азаматы» атағын тапсырды. Дастан КЕНЖАЛИН, Суреттерді түсіргендер С.БОНДАРЕНКО, Б.ОТАРБАЕВ.