Сонымен ЭКСПО-2017 халықаралық мамандандырылған көрмесі аясында ұйымдастырылатын Дю Солей циркінің қойылымына билеттер 2017 жылғы 10 мамырдан бастап сатылымға түсті.
Штаб-пәтері Монреаль қаласында орналасқан Дю Солей циркі қазіргі таңда ойын-сауық индустриясындағы алып компаниялардың біріне айналған. Цирк ұжымында әлемнің 50 елінен жиналған 4000 жуық адам еңбек етеді, оның
1300-і − әртістер. Әлемге әйгілі Дю Солей циркі осы уақытқа дейін әлемнің 400-ден астам шаһарында өнер көрсетіп үлгерді. Енді олар ЭКСПО-2017 аясында алғаш рет Астанаға ат басын тіремек.
Қазақстанның бай мәдениеті мен тарихынан және «Болашақ энергиясы» атты көрме тақырыбынан шабыттанған цирк әртістері Астана тұрғындары мен қонақтары үшін арнайы эксклюзивті «REFLEKT» шоу-бағдарламасын дайындады. Таңғажайып қойылымда қазақ халқының бай мәдени мұрасы мен адамзаттың болашаққа деген асыл армандары өзара өріліп жатады. Жалпы, цирк тарапынан 2017 жылдың 10 маусымынан 10 қыркүйегіне дейін 71 қойылым жоспарланып отыр. Цирк қонақтары бірегей шоуды арнайы жабдықталған үшбұрыш тәріздес павильонда тамашалай алады. Оның сыйымдылығы 2000 көрерменге арналған. Қойылым тұсаукесері көрме алаңында 16 маусым күні өтеді.
Дю Солей циркінің таңдай қақтырарлық қойылымының куәгері болу үшін ЭКСПО-2017 көрме қалашығына келіңіз. Цирк қойылымдарының билет құны 4000 теңгеден басталады.
Жылқыбай ЖАҒЫПАРҰЛЫ,
«Егемен Қазақстан»
