Айкидо айкикай не екенін білесіз бе?

Соңғы уақытта Орал өңірінде айкидо айкикай спорт федерациясының қызметі жанданып келеді. Бұл спорттың ерекшелігі қандай екенін екінің бірі біле бермеуі мүмкін. Бұл тұрғыда айкидо айкикай жауынгерлік қорғаныс өнерінің бір тармағы болып табылатынын айта кеткен жөн. Нақтырақ айтқанда, Орал­дағы айкидо айкикай үйір­месін осыдан бірнеше жыл бұрын федерацияның басшысы, бас нұсқаушы А.В.Пас­ту­хов ұйымдастырды. Со­­дан бері ол балалар мен ере­­сек­тер­ге жапонның жауын­гер­лік өнерін жіті түсіндіріп, біл­генін үйретуде. Андрей Вла­димиро­вич айкидоны Ресейден үйреніп, кейін сол жақ­та арнайы емтихандар мен сы­нақ­тардан өткен. Ресейдің арнайы жоғары оқу орнында оқып, айкидо мамандығын ал­ған. Оралда айкидо үйірмесін ашып, кейін облыстық федерация­ны құрды. Үшінші дан иегері болып табылатын Андрей Пастухов он жыл ішінде төрт қара белбеу иесін, бірінші, екінші және үшінші кю иелерін және тағы басқа да түрлі дәреже иелерін, халықаралық айкидо федера­ция­сына мүше бірнеше шәкіртті дайындап шығарды. 2008 жылы алғаш рет көршілес Самара қаласында өткен айкидо шебері Александр Качанның семинарына оқушыларын бастап алып барды. Олар сол жерде тәжірибе жинақтап, арнайы емтиханнан өтті. Содан бері оралдық айкидошылар Қазақстан құрамасы атынан Ресейдің Самара, Ульяновск, Йошкар-Ола қалаларында жапон шеберлерінің қатысуымен өткен семинарларға қатысып жүр. Нұсқаушы Асан Мол­да­ға­ли­дың бастауымен 2014 жылдан бері Оралдық айкидошылар Самара қаласында жыл сайын өткізілетін «Волжские перекати» атты ашық аймақтық айкидо фестиваліне қатысып, белсенділік танытып келеді. Жарысқа еліміз атынан қа­ты­сатын жалғыз команда бол­ған­дық­тан, тыңғылықты дайындалады. Мұндай үлкен шараларға қатысу шығындарын негізінен ата-аналар көтереді. 2009 жылы ең бірінші рет Оралда айкидодан мәскеулік ше­бер, Ресейдің айкидо айкикай федерациясының ви­це-президенті, Ресей Федера­ция­сының алтын белбеу сый­лы­ғының иегері Александр Качанның жетекшілігімен ай­мақтық семинар өткізілді. Осындай семинар кейін 2010 және 2011 жылдары жалғасын тап­ты. Ал одан кейінгі семинарлар Ресейдің Мары республикасы бойынша айкидо бөлімінің жетекшісі, Ресейдің ұлттық айкидо кеңесінің «Торнадо» сый­лығын иеленген Александр Чуфистов жетекшілігімен 2013 және 2015 жылдары өтті. Негізі күнтізбелік жоспар бойынша жылма-жыл өтуі тиіс семинарлар қаражат мәселесіне орай уақытында өтпей келеді. Тиісті құзырлы құрылымдар тарапынан алдағы уақытта осы олқылықтың орнын толтыру бағытында тиісті іс-шаралар қолға алынса нұр үстіне нұр болмақ. Темір ҚҰСАЙЫН, «Егемен Қазақстан» ОРАЛ