Ескі көліктерді етше турайды

Таяуда Қарағандыда өңдеуші кәсі­п­­орын ұйымдастыру бойынша өткі­­зілген тендердің қорытындысы жа­рия­­ланды. Жеңімпаз атанған «Re­cy­­cling Company» ЖШС жылына 50 мыңдай ескі автомашинаны қа­­был­дап, металдарын қайта бал­­қы­туға жіберуді мойнына алып отыр.   Қолданыстан шығып қалған көлік құрал­дарын кәдеге жаратумен шұғыл­дана­тын Қазақстандағы тұңғыш зауыт­тың құ­рылысы алдағы жылдың наурыз айын­да басталып, жарты жыл ішінде аяқ­талады деп жоспарланған. «Recycling Com­pany» ЖШС зауытты италиялық заманауи қондырғымен жабдықтамақшы. Бұл қондырғының көмегімен сағатына 20-25, ауысым сайын 150-шақты жеңіл автокөлікті «еттартқыштан өткізгендей» етуге болады екен. Яғни, зауыт жыл сайын 50 мың автомашинаны қайта жаратуға болатын металл шикізатына айналдыра алады. Ескі көліктерді металл сынықтарына айналдырмас бұрын, олар міндетті түрде техникалық сұйықтықтардан тазартылып, сыртқы пошымы тығыздалып-нығыздалып, Қарағанды облысындағы металлургиялық зауыттарға жөнелтіледі. Бұл ескі көлігінің қаңқасынан құтыла алмай жүрген азаматтар үшін де, металл шикізатын қолайлы бағамен алғысы ке­летін кәсіпорындар үшін де тиімді болмақ. Қайрат ӘБІЛДИНОВ, «Егемен Қазақстан» ҚАРАҒАНДЫ