Нью-Делиде бейбіт атом мәселесі талқыланды

Ұлттық ядролық орталықтың (ҰЯО) бас директоры Эрлан Батырбеков Оңтүстік Азияның геосаяси мәселелерін назарға ұсынған халықаралық деңгейдегі «Жаңа бағыт: түрлі пікірлер және жан-жақты көзқарас» атты форумға қатысып келді. Әлемнің 65 елінен 250 өкіл келіп қатысқан маңызды шараны  Үндістанның премьер-министрі Нарендра Моди ашып, жүргізіп отырыпты. Э.Батырбековтің айтуын­ша, форум барысында эко­но­микалық интеграция, көпжақ­ты әріптестік, ха­лық­­ара­­­­лық жағдайдағы өз­ге­ріс­тер, аймақтағы қауіп­сіз­дік мә­­селелері кеңінен тал­қы­лан­ған. Эрлан Ғаділетұлы «Will Energy Trump Climate?» ат­ты пікірсайысқа қатысып, Қазақстан атынан көптеген ой­ларын ортаға салған. Дебат ба­рысында айтылғандай, 2016 жылдың қазан айында Қазақстан тарапынан Париж ке­лісімшарты бекітілген. Осы ар­қылы әлемдік саясатта, оның ішінде экономикалық сая­сатта Қазақстан өзінің тө­мен көміртекті дамуға көшу ар­қылы әлемдік экономиканы көміртексіздендіру жө­нін­дегі жаһандық саясатты ұс­та­натынын мәлімдеген. – Мұның барлығы да­ алдағы уақытта өтетін ЭКСПО-­2017-ге тың дайын­дық, Елбасы Нұрсұлтан Назар­бае­в­­­тың тапсырмасымен жа­сыл энергия көзін дамыту, атом­ды бей­біт бағытта насихат­тау барысында атқарылып жат­қан шарулардың бірқатар легі, – дейді Э.Батырбеков. – Елбасымыз Біріккен Араб Әмірліктерінде өткен «Бо­ла­шақтың энергиясы» атты Б­ү­кіләлемдік саммитте атом энергетикасының ма­ңы­з­- ­­дылығын айрықша атап айт­ты. Бейбіт атом қол­да­ну­да Қазақстан дүние жү­зін­де көшбасшылардың бірі бо­лып отыр. 2015 жылы МАГАТЭ әлемдегі алпауыт мем­лекеттердің қолдауымен еліміздің аумағында Төмен байытылған ядролық отын банкін құру туралы шешім қабылдады. Мұны атом энергетикасын дамытамын деген мемлекеттерге арналған кө­мек деп те айтуға болады. Бүгінде уранның орнына торийді қолдану мәселесі де талқылануда екен. Бұл атом саласының тиімділігі жо­ғары болуына ықпал етуі мүмкін. Астанада өтетін ЭКСПО-2017 көрмесінде ха­­лық назарына осы бағытта ат­қарылған жетістіктер дең­­гейі көрсетілуі мүмкін. ЭКСПО-2017 көрмесі ар­қы­лы әлемдік энергетика қай ба­ғытта дамып барады, соны ай­қындауға болады. Және ең ірі мемлекеттердің қандай технологиялық күш-қуаты бар екендігі де көрмеде назарға ұсынылмақ. Раушан НҰҒМАНБЕКОВА, журналист