Неймар екі жылға бас бостандығынан айрылуы мүмкін

Испания прокуратурасы «Барселона» сапында өнер көрсететін Неймарды екі жылға бас бостандығынан айырып, 10 млн.еуро көлемінде айыппұл салуды талап етті, деп хабарлады «Интерфакс». Қазіргі уақытта сот жұмыстары жүріп жатыр. Бұл іс тағы да сол бұрынғы «Сантос» командасынан ауысқан кезде орын алған заң бұзушылық жөнінде. Бұдан бөлек, трансферге қатысы бар «Барселонаның» бұрынғы президенті Сандро Россель мен қазіргі басшысы Жозеп Мария Бартомеуге де айып тағылып отыр. Прокуратура экс-президентті бес жылға қамауға алуды талап етті. Осыған дейін хабарланғандай, «Барселона» Неймарды сатып алу үшін 57 млн. еуро төлеген. Бұл соманың тек 17,1 млн. еуросы «Сантосқа» берілсе, қалған қаржы футболшыға иелік ететін компанияға, яғни ата-анасына аударылған. Алайда, тергеушілердің пікірі бойынша, ойыншы үшін 83,3 млн. еуро (кейбір мәліметтерде 94 млн. еуро) төленіп, «көк-анарлар» салық шығынын осылайша қысқартыпты. Бұл тұста Бразилияның DIS инвестициялық компаниясы зардап шеккен. Marca басылымының ақпарынша, компания оны бес жылға қамалады деген үмітте. Өткен жылдың қыркүйек айында Бразилия соты жалпы құны 48 млн.еуро болатын Неймардың барлық активтеріне шектеу қойып, өзіне 16 млн.еуро көлемінде салықтан жалтарды деген айып таққан болатын. Айта кетейік, Неймар «Барселонаға» 2013 жылы «Сантос» командасынан ауысып келді. Осы уақыт аралығында Чемпиондар лигасын, УЕФА Суперкубогын, клубтық әлем чемпионатын, Испания суперкубогын, екі мәрте Испания кубогын жеңіп, екі мәрте Испания чемпионы атанды.