Илья Ильин ер жігітке тән шешім қабылдады – Мұсайбеков

Кеше ауыр атлектикадан төрт дүркін әлем чемпионы Илья Ильин ұлттық командалар және спорттық резервтер дирекциясындағы кеңесші қызметінен өз еркімен кеткендігін мәлімдеген болатын. Осы жөнінде Мәдениет және спорт вице-министрі Сәкен Мұсайбеков пікірін білдірді. «Болған жағдайды естігенде төбемізден жай түскендей болды. Мен оны мақтан тұтып келемін. Олимпиадаларда тек жеңіс тілеп жүрдім. Ол рекордтарды бірінен соң бірін жаңартты. Мәдениет және спорт министрі Арыстанбек Мұхаммедиұлына да, маған да, министрлік қызметкерлеріне де бұл жағдай ауыр тиді», – деді ол. Бұдан кейін вице-министр спортшының ұлттық командалар және спорттық резервтер дирекциясындағы кеңесші қызметінен кеткендігіне қатысты пікірін білдірді. «WADA кодексі бар. Ол бойынша допинг қолданған спортшы жарыстан шеттетіледі. Ал Илья Ильин жарыстан шеттетіліп отыр. Бірақ ол бұл шектеуді Халықаралық ауыр атлетика федерациясынан да алды. Бұдан кейін оның спорт саласында жұмыс істеуге ешқандай құқығы жоқ. ХОК-тан хат келгенге дейін Илья кеңесші қызметін атқарып келді. Ал хат келгеннен кейін бұл қызметінен де кету туралы шешім қабылдады. Оған ешкім қысым жасаған жоқ, өзінің таңдауы. Илья Ильин ер жігітке тән әрекет жасады. Ол оқығысы келеді. Болашақта бизнеспен шұғылдануы мүмкін. Оған барлығымыз қолдау білдірейік», - деді вице-министр. Айта кетейік, ҚР Ұлттық Олимпиада комитеті Халықаралық Олимпиада комитетінен 2008 және 2012 жылдардағы Олимпиада ойындарына қатысқан қазақстандық спортшы Илья Ильинге қатысты жаза қолданылғандығы туралы ресми хабарлама алды. Спортшының қанынан тыйым салынған препараттар табылған болатын.