Күштілердің қатары сетінеген жоқ

Павлодарда өтіп жатқан бокс­тан Қазақстан чемпионатында соңғы екі күннің ішінде жартылай финалға шыққандар толық белгілі болды. Еліміздің намысын Олимпиялық ойындарда, әлем және Азия чемпионаттарында қорғап жүрген таңдаулы былғары қолғап шеберлері саптарын бұзбай, «медальдар ауласына» қарай қадам басты. Кешегі жартылай финалдық айқастарда өзін жақсы қырынан танытқандардың бірі Рио Олим­пиадасына қатысушы, әлемнің 2013 жылғы қола жүлдегері, шымкенттік  Қайрат Ерәлиев (56 кг) болды. Қарқыны қатты спортшы ширек финалда 18 жастағы алаң иесі Абылай Сайлаубековті талассыз жеңді. Ал келесі ке­зеңде ол Азия ойындарының чемпионы, жақында осы сал­маққа ауысып келген Ілияс Сүлейменовпен финалға шығу жолында шай­қасады. Өзінің жаңа салмақтағы бірінші додасын Павлодар рингінде өткізген астаналық боксшы бұл жолы Асылхан Ұзақбаевпен жекпе-жегін мер­зімінен бұрын аяқтады. Себебі, Ілиястың қарша бораған соққысынан шәкіртін сақтап қал­ғысы келген атыраулық жат­тық­тырушы екінші раундта ұрыс­ты жалғастырудан бас тартты. Бұдан әрі 64 килоға дейінгі спортшылар шаршы алаңға шық­ты. Оны көкше­таулық Сабыр­жан Бекбер­геновті тізе бүктірген алматылық Ділмұрат Межи­тов жеңіспен бастап берді. Ал пав­лодарлық 20 жасар Қуан Қуатов қостанайлық Николай Швабты тартысты талас үстінде әдемі ұтты. 75 килоға дейінгі салмақта да тартысты шайқастар аз болған жоқ. Сол қолғап түйістірулерде Ерік Әлжанов, Манат Өмірзақов, Тұрсынбай Құлахметов және Әбіл­хан Аманқұл медальдар сарапқа салынатын шеңберден табылды. 91 кг салмақта Азия мен Азия ойындарының чемпионы Антон Пинчук екі жылдық үзілістен соң рингке қайта оралған қарағандылық Алмат Серімовтің осал тұсын тапты. Сондай-ақ, бұл салмақта Арбек Әбдуғаниев, Еркін Мұхаметжан және Серік Мұсаділов жарысты жалғастыруға мүмкіндік алды. Бүгін – чемпионаттың дем-ал­ы­с күні. Ертең жартылай фи­налдық жекпе-жектер өтеді. Ал 27 қарашада чемпионат мәреге жетеді. Фархат ӘМІРЕНОВ ПАВЛОДАР Суретті түсірген Данияр МАЙЛЫБАЕВ