– Фильмнің идеясы марқұм Меңтай Өтепбергеновтікі. Бір күні киностудияда кездескенімізде, киномеханиктер туралы ойын айтты. Кейіннен оның ойын тарқатып, сценарий жазып шықтым. Сценарийді көрген сәттен бастап, ауырып жүргеніне қарамастан, басты рөлді сомдауға дайындалып, қуанып жүрді. Амал нешік, фильмнің түсірілімге шыққанын көре алмай кетті. Алайда, оның есімі титрға жазылады, – деді режиссер Ермек Тұрсынов.
Фильм екінші дүниежүзілік соғыс кезінде неміс қариясынан сыйға киноаппарат алған солдат туралы. Соғыстан оралған жауынгер үйінің қаңырап бос тұрғанын көреді, жақындары қайтыс болған. Ол Германияда қарт немістен сыйға алған кинопроектормен кино қояды. Қайғысынан тез айығуына осы фильмдер ықпал етеді. Өмірді қайта бастауға қуат алады. Сөйтіп, қартайған шағына дейін ел аралап, киноаппаратпен ескі фильмдерді көрсетіп, кинематографтың көмегімен әлемді өзгертуге болады деп сенеді.
«Киномеханик» кинокартинасы Мәдениет және спорт министрлігінің тапсырысы бойынша түсірілгелі отыр. Картинаның продюсері Қанат Төребай екінші дүниежүзілік соғыс суреттелетін эпизодтар өткен жылдың желтоқсан айында Будапеште түсірілгенін айтып, түсірілген 8 минуттық бейнематериалды cараптау кеңесінің мүшелеріне көрсетті.
– Соғыстан кейінгі жылдарды сахналауға қажетті нысандарды табу үшін Қазақстанның барлық аймағын шарлап шықтық. Аралай келе, фильмді Жаркент қаласы маңында түсіруді жөн деп шештік. Біздің картинамыз ХХ ғасырда кино өнерін таратушыларға бағышталады, – деп түйіндеді продюсер.
Ермек Тұрсыновтың бұл фильмінде басты рөлдерді Мұрат Мақажанов және картинаның қоюшы суретшісі Қуат Тілеубай сомдайды. Продюсер Қанат Төребайдың айтуынша, фильмде отандық және шетелдік танымал актерлер бой көрсетеді. 31 мамыр күні түсірілім тобы Алматы облысына аттанады. Соңғы түсірілімдер Алматыдағы «Қазақфильм» киностудиясының аумағында және Талғар қаласының Мәдениет сарайында өтеді.
Айгүл Аханбайқызы,
«Егемен Қазақстан»
АЛМАТЫ
