Әлемнің ең озық шөгеншілері бас қосқан бәсекеде «Astana Polo Club» командасы «Munchin Gold Cup 2017» жүйесі бойынша сынға түсіп, Нидерланд, Швейцария және Германия секілді алпауыт елдерді артта қалдырып жеңіс тұғырынан көрінді.
Ал «Almaty Polo Club» командасы «Munchin Gold Cup» сайысында Нидерланд, Швейцария, сондай-ақ, жарыс иелері германиялықтарды шаң қаптырып, жарыс жолында дара шықты.
«Бізге бұл жеңіс оңайлықпен келген жоқ. Қарсыластарымыз өте мықты шөгеншілер. Еуропа елдерінде бұл спорт түрі аса танымал ойын, бірақ біз де дес бермейміз», дейді «Almaty Polo Club» командасының капитаны Қуаныш Мұсабеков.
«Бұл біздің халықаралық аренадағы бірінші жеңісіміз емес. Мәселен, «Astana Polo Club» командасы 2016 жылы Аргентинаның Лухан қаласында өткен халықаралық турнирден I орынмен оралған болатын. Сондай-ақ, 2017 жылы Аргентинадағы «Santa Catalina Summer Cup» және «Torneo Summer Polo Match» халықаралық турнирлерде біздің командалар шетелдік шөгеншілерді басып озып, I орыннан көрінді. Биыл өз елімізде өткен «Almaty Snow Polo Cup» халықаралық додасында да I орын өзімізге бұйырды. Ал 2017 жылы Аргентинаның Лухан қаласындағы халықаралық сайыста «Almaty Polo Club» бірінші орынға шығып, ең үздік командалардың қатарына қосылды. Міне, Мюнхендегі жеңіс те біздің еншімізде», дейді Халықаралық шөген федерациясының бірінші вице-президенті Сәрсен Құранбек.
Әлемдік аренада ел мерейін үстем еткен шөгенші жігіттерді біз де құттықтап, жеңісті жолдың жалғана беруін тілейміз.
Арман ОКТЯБРЬ,
«Егемен Қазақстан»
