Үшiншi айдың үшiншi жұлдызында жапондар балдырған қыздардың әдемi болып өсуiн, болашақта бақытты болуын тiлейдi. Дiни маңызы бар осы момоно сэкку, яки хинамацури күнiне арнап қыз өсiрiп отырған әр отбасы үйдегi арнайы орынға наурыз туғанға дейiн ежелгi ханзадалар мен ханшайымдар, самурайлар, т.б. үлгiсiндегi ұлттық қуыршақтарды қою керек.
Қуыршақтардың орналасу ретiнiң де мәнi бар. Жетi сатыдан тұратын «қуыршақтар ордасының» ең жоғарғы жағында «ата қуыршақ» пен «ана қуыршақ» орналасады. Ал ең төменгi екi сатыға қыз баланы қызықтыратын айна, шай демдеу рәсiмiнiң құралдары, ине шанышқыш, т.б. қойылады. Жалпы, хинамацури ғана емес, жапонның барлық ұлттық мерекелерiнен еуропалық немесе басқа шет елден шыққан затты көрмейсiз. Хинамацури қуыршақтарының кескiн-келбетi мен киiмi, сақал-мұрты мен шаш үлгiсiне дейiн жапондық екенiн айшықтап тұрады.
Хинамацури күнi өткен соң қуыршақтарды жинап тығып қояды да, келесi жылы наурыз туарда қайта шығарады. Қуыршақтар ордасы безендiрiлген күйi наурыздың үшiнен кейiн де тұра беретiн болса сол үйдiң қызы өскенде отырып қалады деген ырым бар. Яғни, қуыршақтар наурыздың үшiне дейiн ғана тұру керек. Одан кейiн неғұрлым ұзағырақ жиналмай тұрса қыздың болашақта теңiн табуы соғұрлым кешеуiлдейдi деп ойлайды жапондар.
Мушянингйоу – батыр қуыршақ. Ер балаларға арналған бесiншi айдың бесiншi жұлдызында атап өтiлетiн ғұрыптық мереке осындай атқа ие. Бұл күні ұл тәрбиелеп отырған жапондар баласы болашақта самурайдай ержүрек болуы үшiн рәсімдік ғұрыптарға қатысады.
Шарафат Жылқыбаева
