Бұл орайда, облыс әкімдігі өңірлік туристік ұйымдармен бірлесіп, көрме қонақтарына арналған 3 және 5 күндік туристік бағыттар әзірлепті. Нақтырақ айтсақ, Оңтүстікке келген қонақтар Түркістан қаласында «Әзірет Сұлтан» қорық-мұражайын, Сауран қалашығын аралап, Отырар ауданындағы Арыстан баб кесенесінде және Отырар қалашығында болып ел тарихына қаныға алады. Сондай-ақ, Бәйдібек ауданындағы Ақмешіт үңгірі, Домалақ ана кесенесінің, Қазығұрт ауданындағы «Кеме қалған» мемориалды кешені мен «Адам ата-Жер Ана» табиғи ескерткіші шетелдіктерді қызықтырары анық. Ал Төлеби ауданы аумағындағы «Сайрам-Өгем» мемлекеттік ұлттық табиғи паркі мен Түлкібас ауданындағы «Ақсу-Жабағылы» мемлекеттік табиғи қорықтың экологиялық бағыттағы туризмді ұнататындар үшін берері мол. Әрине, облыс орталығы Шымкенттің өзінде танымдық экскурсия жасайтын орын көп. Саялы ағаштарымен танымал Дендросаябақта, авторлары Мемлекеттік сыйлық иегері атанған ерекше жоба – Тәуелсіздік саябағы, Бәйдібек би ескерткіші, Наурыз алаңы, жаз айлары жағасы босамайтын «Жайлаукөл»... тізе берсек облыс орталығында қонақтарға мақтан ете көрсететін орын көп.
ЭКСПО-2017 халықаралық көрмесі қонақтарына ұсынылатын туристік маршруттардың бойындағы қонақ үйлердің барлығы қызмет көрсетуге дайын. Сондай-ақ, қонақтар назарына Түркістан және Отырарда орналасқан 2 этноауыл ұсынылады.
Сондай-ақ, көрме шеңберінде тамыздың 29-ы мен қыркүйектің 3-і аралығында Оңтүстік Қазақстан облысының мәдени күндері өтеді. Оған 610 адамнан құралған 17 шығармашыл ұжым қатысып, өнерлерін көпшілікке ұсынады. Оның ішінде жергілікті 22 қолөнер шеберлері де бар.
Оңтүстікке келуге ниет білдірген туристерге барлық жағдай жасап отырған облыс әкімдігі халықаралық көрмеге баратын жергілікті тұрғындарға да қолдау көрсетпек. Бұл орайда, Астана қаласында облыстан көрмеге қатысушыларды орналастыру үшін екі университеттің жатақханаларынан күніне 600 орын алдын ала алынып қойылған. Көрменің өту кезеңіне көлік қатынасы ұлғайтылып, қосымша орындар қарастырылған. Мысалы, темір жол құрамдары 86 вагонмен толықтырылса, әуе қатынасы бойынша қосымша 16 755 орын беріліпті. Сондай-ақ, 450 орындық 10 автобус қосылатын болады. Облыстан 3 750 мектеп оқушысын, 179 ардагер, зейнеткер және мүмкіндігі шектеулі азаматтарды көрмеге алып бару жоспарланған.
Халықаралық көрменің тақырыбына сай қуат көзін жаңғырту бойынша оңтүстіктен 4 жоба интерактивті картада таныстырылатын болады. Атап айтқанда, облыста электр энергиясын өндірудің тапшылығын төмендету және жаңғырмалы энергия көздерін қолдану мақсатында жүзеге асырылған Сайрам ауданындағы күн электр стансасы, Сарыағаш ауданы Келес өзеніндегі шағын ГЭС. Сондай-ақ, еліміздегі және сыртқы нарықтағы тұтынушылар мен ірі компанияларды жоғары сапалы майлау материалдарымен қамтамасыз ету мақсатында жұмыс істейтін, өндірістік қуаты жылына 70 мың тонна болатын «Hill Corporation» ЖШС-нің жобасы ұсынылмақ. Биогаз өндіретін және әрі қарай электр энергиясын алуға мүмкіндік беретін шөгінділерді өңдеу бағытындағы жоба да көрме қатысушыларына таныстырылады. Бұдан бөлек 35 кәсіпорын елорда тұрғындары мен қонақтарына ауылшаруашылық өнімдерін ұсынбақ.
Ғалымжан ЕЛШІБАЙ,
«Егемен Қазақстан»
