Қазақстан бүгінгі таңда әлемдік туристік кеңістіктің өзіндік орны бар бір бөлігіне айналды. Әлем назарына ұсынылған ЭКСПО-2017 көрмесі осы жолдағы жаңа қадам болып саналады.
Еліміздің тәуелсіздік жылдарында қол жеткізген осынау табыстары Қазақстан Республикасының Тұңғыш Президенті – Елбасы Нұрсұлтан Назарбаевтың жүргізіп келе жатқан салиқалы саясатының негізінде мүмкін болды. Бүгінгі Қазақстан келбетінен біз армандаған, біз қалаған болашақтың бейнесі анық көрінеді. Біздің еліміз ядролық қарусыз әлем құруды, конфессияаралық және ұлтаралық келісімді нығайтуды, әскери шығындарды әлеуметтік мақсаттарға жұмсауды, экстремизм мен терроризмге қарсы ымырасыз күресті, болашақ энергиясы саласындағы жаңашыл қадамдарды жақтай отырып, осы бағыттар бойынша келешекке арналған мақсат-міндеттерін нақтылай түсті.
Осылайша, еліміз болашақ әлемді құрылымдау үрдісінің белсенді қатысушысына айналды. Қазіргі таңда Қазақстан жаһандық саяси үдерістердің мейнстримі болып табылады. Бұл сөзімізге дәлел ретінде әлемді толғандырған көптеген жаһандық проблемалардың түйінін шешу мақсатында ұйымдастырылған тарихи келіссөздердің Астанада өтуін айтуға болады. Мәселен, Иран ядролық бағдарламасына қатысты әлемдік түрлі көзқарастарды бір-біріне жақындастыруда, Сирия дағдарысын реттеуде Астана беделді әрі байсалды бейтарап алаң бола білді.
Қазақстан шынайы көзқарастар мен оң қалыптасқан үдерістерді өзара үйлестіріп отыр. Қазіргі таңда сын-қатерлер мен дағдарыстардан сақтануға бағытталған «Алдын алу дипломатиясы» ұранын басшылыққа алу маңызды. Бұл орайда көбіне әлеуметтік-экономикалық мәселелерге баса назар аударып, «бейбітшілік», «қауіпсіздік» және «даму» үштігінің ажырағысыз байланысы («Security-Development Nexus») қағидасын жан-жақты дамыту қажеттігі басымдыққа алынуда. Осы тұрғыда тұрақты даму мақсаттарын сәтті жүзеге асыру маңызды мәселеге айналып келеді. Аталған бағыттағы әрекеттеріміздің барлығы Қазақстанның стратегиялық бағдарламалық құжаттарына сәйкес келеді. Сонымен қатар, БҰҰ мақсаттарымен және жаһандық басымдықтармен сәтті үндестік табады.
Бүгінгі таңда еліміз Елбасы Нұрсұлтан Назарбаевтың «Болашаққа бағдар: рухани жаңғыру» атты бағдарламалық мақаласында көрсетілген рухани жаңғырудың маңызды кезеңін бастан өткеріп жатыр. Сол себептен де мұндай ауқымды шараның Қазақстанның Үшінші жаңғыруының басталуы аясында өтуінің айрықша маңызы бар.
Ал БҰҰ Қауіпсіздік Кеңесіне мүшелігіміз жас мемлекетіміздің сыртқы саяси стратегиясын жүзеге асыру барысындағы ірі жеңісі болып табылады. Сонымен бірге, бұл – тәуелсіз еліміздің әлемдік аренадағы сапалық жаңа мәртебесіне ие болуының айқын дәлелі.
Осы ретте біз Қазақстанның БҰҰ Қауіпсіздік Кеңесіндегі жұмысын жалпыұлттық жоба ретінде қарастырғанымыз жөн. Әсіресе, Қауіпсіздік Кеңесінің алаңын ядролық қарусыздану мен таратпау жөніндегі өз ой-пікірімізді, бастамаларымызды ілгерілету үшін барынша пайдалануымыз қажет. Қазақстан КХДР жөніндегі комитеттің жұмысына да белсенді қатысуда. КХДР-дің ядролық-ракеталық бағдарламасы бүгінде бейбітшілік пен қауіпсіздік үшін ең елеулі сын-қатерлердің бірі болып отыр.
Қорыта айтқанда, Қазақстанның тереңнен ойластырылған сыртқы саясаты, онда қамтылған басым бағыттар жаһандық үдерістерге, әлемдік ағыстарға оңтайлы, жағымды сипатта үн қосуда. Бұл бағытымыз еліміздің жетістіктерін еселеп, ел тәуелсіздігінің нығаюына оң ықпал ете беретін болады.
