− Үстел теннисінен журналистер арасына өткен жарыс тартысты әрі қызықты шара болды. «Спорт» – ағылшын тілінен аударғанда «ойын, көңіл көтеру» дегенді білдіреді. Ой еңбегінің майталмандарына бүгін өз шеберліктерін танытуға әрі мерекеде көңіл сергітуге мүмкіндік туды, − деді сенатор Дархан Кәлетаев.
Сенат депутаты журналистика – ой еңбегі, ал спорт сергектік пен денсаулық кепілі екенін айта келіп, оның адамдарды бірлесе қимылдауға, жеңіске ұмтылуға, ынтымақтастыққа баулитын шара екенін айтты. «Бұл жағынан бәрі бірлесе қимылдап, халыққа жедел әрі сапалы ақпарат беретін редакция жұмысына ұқсайды. Екеуі де қажырлылық пен табандылықты қажет етеді. Екеуі де жеңіске ұмтылады», деді ол.
Халықаралық «ҚазАқпарат» ақпарат агенттігінің фототілшісі Дәурен Мұхамеджанов Парламент Сенаты турнирінің жеңімпазы әрі кубогының иесі атанды. Журналистика ардагері, публицист Қайнар Олжай екінші орын алды. Парламент Сенатының депутаты Дархан Кәлетаев пен Мәдениет және спорт вице-министрі Сәкен Мұсайбеков жеңімпаздарға марапаттарды табыс етті.
«Егемен ақпарат»
