Демалыс орны өз жұмысын 12 маусымнан бастады. Жоспар бойынша, әрқайсысында 200 бала демалатын төрт ауысымда жаз бойы 800 жеткіншек қамтылмақ. Әр ауысымның ұзақтығы – 15 күн. Лагерьге аз қамтылған, көп балалы, асыраушысынан айырылған отбасылардың балалары және үздік оқушылар тартылуда.
– Тоғыз ай уақытын мектепте өткізген оқушылар үшін жазғы демалыс мезгілі биыл ерекше болмақ, – дейді демалыс орнының ашылу салтанатында сөз алған аудан әкімі С.Әбеуова. – Демалыс уақытының тиімді өтуі, ең алдымен, оның жұмысының жүйелілігіне байланысты. Балалардың жазғы демалыс уақытында жақсы сауығып қайтуына лагерьде барлық жағдай жасалған. «Факел» жазғы лагерінде балалар демалып қана қоймай, күн сайын саяхаттар жасап, тренингтер мен ойындар, әртүрлі кештер мен сайыстар өткізеді.
Биыл лагерьде Ақтоғай ауданына қарасты 17 елді мекеннің 7-15 жас аралығындағы балалары тынығады. Осы игі бастаманы қолға алған облыстық мәслихат депутаты Айман Бекболатқызына және Шашубай кенті «Мектеп-балабақша кешені» ұжымына, аудандық білім бөліміне көпшіліктің ризашылығы зор.
– Бірнеше жыл бұрын Балқаш кен-металлургия комбинатының өндірістік жұмыс бағыты халықаралық стандартқа көшкен еді. Стандартқа сай кәсіпорын тек қана өндіріс бағытында жұмыс жасай бастады. Сондықтан бұрын «Қазақмыс» корпорациясы айналысып келген әлеуметтік қолдау бағытындағы жұмыстар мен нысандардың барлығы мемлекетке, яғни жергілікті басқару органдарының құзырына өткен болатын, – дейді облыстық мәслихаттың депутаты Айман Бекболатқызы. – Олардың қатарында осы «Факел» сауықтыру лагері де бар. Төрт жыл бұрын облыстық мәслихаттың комиссия отырысында аталған ғимараттарды сақтап қалу мәселесін көтеріп, депутаттық жұмысымның барысында бақылауға алған болатынмын. Қолымызға тиген лагерьді қайта қалпына келтіруде қиындықтар болды. Қажетті қаржы көзін облыс әкімінен сұрадық. Еңбегіміз еш кеткен жоқ.
Мирас АСАН,
«Егемен Қазақстан»
Қарағанды облысы,
Ақтоғай ауданы
