Конференцияға еліміздің Сыртқы істер министрі Қайрат Әбдірахманов, Президенттің халықаралық мәселелер жөніндегі көмекшісі Нұрлан Онжанов, Парламент Мәжілісі Халықаралық істер, қорғаныс және қауіпсіздік комитетінің төрағасы Мәулен Әшімбаев, «Астана ЭКСПО-2017» ұлттық компаниясы» АҚ басқарма төрағасы Ахметжан Есімов, сондай-ақ, еліміздегі шет мемлекеттердің қазіргі және бұрынғы елшілері қатысты.
Алқалы жиынды Елбасы кітапxанасы, Сыртқы істер министрлігі, Қазақстанның Тұңғыш Президенті – Елбасы қоры, қор жанындағы Әлемдік экономика және саясат институты бірлесе отырып ұйымдастырды.
Конференцияны жүргізген Қайрат Әбдіраxманов алдымен көпшілік назарына Қазақстан Республикасы дипломатиялық қызметінің 25 жылдығына арналған бейнебаянды ұсынды. Бұл бейнебаянда еліміздің сыртқы саясатының басты кезеңдері, оның даму жолдары, әлемнің алпауыт елдерімен әріптестік қарым-қатынас орнатуы, Елбасының Семей полигонын жауып, ядролық қарудан бас тартуы, еліміздің егемендік алғаннан кейінгі жеткен жетістіктері қысқаша көрсетілді.
Жиында сөз алған Бенилюкс елдеріндегі бұрынғы елші, бүгінде «Астана ЭКСПО-2017» ұлттық компаниясының басшысы Ахметжан Есімов өткен күндерге шолу жасап, өзінің Еуроодақта және НАТО-да тұрақты өкіл қызметін атқарғанын, Қазақстан-Еуроодақ бірлескен комиссиясының төрағасы болғанын айтты және сол уақыт аралығында жинаған тәжірибесін қазіргі қызметінде де пайдаланып жүргенін мәлімдеді.
– Еліміз көпвекторлы сыртқы саясат ұстануының арқасында өз шекарамызды айқындадық, экономикамызды дамыттық. Сонымен қатар, xалықаралық процестерге қатысуы арқылы Қазақстан ашық және бейбітсүйгіш ел ретінде танылып келеді. Осы жұмыстарда дипломаттарымыздың рөл атқарғандары анық, – деді Аxметжан Есімов.
Конференция барысында сөз алған Қазақстанның Тұңғыш Президенті – Елбасы кітапxанасы директорының орынбасары Әмірxан Раxымжанов 25 жыл ішінде Мемлекет басшысының түрлі деңгейдегі мінберлерден көптеген идеялар ұсынғанын, оның барлығы дерлік қолдау тапқанын ерекше атап өтті.
Сонымен қатар, шара барысында Елбасы Нұрсұлтан Назарбаевтың Сириядағы дағдарысты реттеу жолдарын іздеуге арналған белсенді әрекеттері жайлы Нұрлан Онжановтың «Бітімгер: Сирия түйіні» атты кітабы таныстырылды. Кітапта Елбасының бітімгерлік қызметі әр қырынан әдемі ашып көрсетіледі.
– Тәуелсіздіктің алғашқы жылдарынан бастап Елбасымызға бітімгерлік жөнінде өтініштер көптеп түскен. Мемлекет басшысының бітімгерлік қызметі әрқашан табысты жүзеге асып келеді. Мәселен, Таулы Қарабақ қақтығысын реттеуге, 2005-2010 жылдары Қырғызстанда жағдайды тұрақтандыруға қатысты іс-шаралар үлкен үлесін қосты. Сонымен қатар, Мемлекет басшысының Түркия мен Ресей арасындағы шиеленісті шешуде маңызды рөл атқаруы еліміздің беделін одан әрі арттыра түсті, – деді Нұрлан Онжанов.
Шараға жиналған қауым еліміздің дипломатиялық қызметіне арналған «Тәуелсіз Қазақстан дипломатиялық қызметінің 25 жылдық тарихынан» атты фотосуреттер көрмесімен танысты.
Айта кетейік, Қазақстан 1991 жылы тәуелсіздік алған күннен бастап, әлемнің 130 мемлекетімен дипломатиялық қарым-қатынас орнатты.
Аян ӘБДУӘЛИ,
«Егемен Қазақстан»
