Ұлттық күн аясында ЭКСПО қонақтарының назарына тай мәдениетін және оның тұрмыс салтын бейнелейтін әсерлі шоу ұсынылды. Көрермендер «Хон», «Киннари», «Рамаяна маскалар» ұлттық билерін және Джо Луис қуыршақтарының қойылымын тамашалады. Шоу барысында 2016 жылғы Таиланд вице-мисі Пинтхип «Кван» Оракхорн ханым жиналған жұртты өз елінің биіне үйретті. Ол, әсіресе, өнерімен әрі сұлулығымен көпшілікті тәнті етті. Бұдан бөлек, қонақтарға тай елінің баламалы энергетика саласындағы жетістіктері, ауыл шаруашылығында биоэнергетика өндіру технологиялары арнайы бейнебаяндар арқылы көрсетілді.
Мерекенің ресми бөлімінде Таиландтың Энергетика министрі Анантапорн Канджанарат баламалы энергия алу жолында ауыл шаруашылығы қалдықтарын қайта қолдану тәжірибесімен бөлісуге дайын екендіктерін жеткізді. «Біздің энергетикалық саясатымыз тұрақтылық пен технологиялық дамуға бағытталған. Павильонымыз «Барлық адамға арналған биоэнергетика» құрылымына сай құрастырылған. Бұл Таиланд үкіметінің энергетикалық стратегиясын жүзеге асыруға септігін тигізіп қана қоймай, біздің жергілікті фермерлерімізге де көмектеседі», деді ол.
Басқосуда Қазақстан Республикасы Денсаулық сақтау вице-министрі Алексей Цой екі ел арасында тығыз дипломатиялық қарым-қатынас орнағанын айтып, тай халқына деген ілтипатын әңгімеледі. «Ұлттық күнді өткізу қатысушыларға өзінің мәдениетін, дәстүрін, өмір сүру үлгісін және ұлттық тағамдарын көрсетуге мүмкіндік береді. Таиланд мерекесі екіжақты тиімді әріптестікті нығайтып, сол елдің бизнес қауымдастығына Орталық Азия мен ТМД аумағында жетекші компаниялардың бірі атануына мүмкіндік береді», деді А.Цой.
Таиланд павильоны көрме басталғалы көпшілік көңілінен шығып келеді. Халықаралық шара ашылғалы бері павильонды 100 мыңға жуық адам тамашалап үлгерген екен. 900 шаршы метрден асатын тай аймағы ойын-сауық пен танымдықты үйлестіре құрылған үш көрме залынан тұрады. Онда интерактивті демонстрация арқылы қант құрағы, эвкалипт, каучук, күріш, жүгері, тапиоки, көң мен пальма майынан энергия алу технологияларымен танысуға болады. Олар ЭКСПО-2017 көрмесінде үздік бес павильонның қатарынан көрінуді көздейді. Бұл мақсатқа тыңғылықты дайындалғандары да көрініп тұр.
Павильонда бірнеше ұйым бөлмелерін ашқан. Олардан тай мемлекетінің экономикасы, қолөнері, мәдениеті мен туризмі туралы барлық ақпаратты алуға болады. Бұдан бөлек, Таиланд Инвестициялар жөніндегі кеңесі 30 маусым-5 шілде, 11-16 тамыз аралығында іскерлік топтар мен инвесторлар үшін шеберлік сыныптарын өткізбек. Сондай-ақ, тай театры, бейнелеу мен қолөнеріне арналған сан алуан мәдени-бұқаралық шаралар жоспарланған. Жақында мемлекеттің Сауда министрлігі ЭКСПО-2017 көрмесіне тағы 16 компания тартты. Олар «халал» өнімдерін таныстырады.
