![Жетісу өнерпаздары шақырады](/article_photo/1499316069_article_b.jpeg)
Кеше Орталық коммуникациялар қызметінде өткен баспасөз мәслихатында Алматы облысы әкімінің орынбасары Жасылық Мұқашұлы Астанадағы Алматы облысының мәдениет күндері туралы баяндады. Мәлімдеуінше, көрме қонақтары мен қала тұрғындары 11-15 шілде аралығында Жетісудан келген өнерпаздардың өнерін тамашалай алады.
«Ел тарихында қалатын шараны тамашалауға әлемнің түкпір-түкпірінен келген миллиондаған қонақтар біздің өнерпаздардың өнерімен кеңінен танысатын болады. Атап айтар болсақ, Б.Римова атындағы облыстық драма театры, Сүйінбай атындағы облыстық филармониясы, «Алатау әуендері» концерттік бірлестігі, М.Тынышпаев атындағы облыстық тарихи-өлкетану музейі, Көркемсурет галереясы мен Қолөнер шеберлері жақсы дайындықпен келе жатыр. Алматы облысы мәдениет күндерінің салтанатты ашылуы «Жетісу – жұмақ мекенім» шарасымен басталады. Ал жабылу рәсімі шілденің 15-і күні Амфитеатрда өтеді. Облысымыздан тек қана мәдени шараның өзіне 332 өнерпаз қатысатын болады», деді Жасылық Мұқашұлы.
Шараның салтанатты ашылу рәсімі «Қазақстан» концерт залында өтеді деп жоспарланған. Ал 12 шілдеде Жастар сарайында «Сүйінбай атындағы Алматы облыстық филармониясы мен «Құлансаз» фольклорлық-этнографиялық ансамблінің қатысуымен «Жетісу – ән-жырдың ордасы» атты дәстүрлі әндер концертін, 14 шілде этноауылда «Ауылың сенің іргелі» атты театрландырылған көрінісі мен дәстүрлі концертін халық назарына ұсынады. Осы сарайда 13 шілдеде Алтынай мемлекеттік халық би ансамблінің «Талды арулары» концертін тамашалауға болады.
ЭКСПО-2017 көрмесінің келушілеріне Б.Римова атындағы драма театрының да базарлығы айрықша. Мәселен, астаналықтар мен қала қонақтары 11-13 шілде күндері «Жастар» театрының сахнасында облыстық театрдың тырнақалды қойылымдарының бір парасы «Ромео мен Джульетта» трагедиясын, «Ең жақсы еркек» комедиясын, «Ілияс» деректі драмасын тамашалай алады. Ал 11-15 шілдеде Ұлттық-әскери музейінде М.Тынышпаев атындағы Алматы облыстық тарихи-өлкетану музейінің «Тарих беттерінен» көрмесі өтеді. Көрмеге Алматы облысынан арнайы әкелінген тарихи экспонаттар қойылады. Келушілер ғалым-саяхатшы Шоқан Шыңғысұлы Уәлихановтың қолданған заттарымен осы көрме арқылы таныса алады. Қазақстан Республикасы Қарулы Күштерінің ұлттық әскери-тарихи музейінде «Ата-баба аңсаған Мәңгілік Ел» атты көркемсурет көрмесі де өтеді. Ұйымдастырушы – Алматы облыстық «Көркемөнер» галереясы. Көрмеге галереяның негізгі қорындағы бұған дейін көркемөнертанушылардың жоғары бағасын алған жергілікті суретшілердің туындылары қойылады. Көрмені 11-15 шілде аралығында тамашалауға болады. Сондай-ақ, Алматы облыстық «Ұста Дәркембай» атындағы қолөнер музейінің тартуы «Шығыс базары» 11-20 шілде аралығында Этноауылда өтпек. Қолөнер шеберлерінің металдан, теріден, ағаштан жасалған бұйымдары қонақтардың назарына ұсынылады. Қолөнер музейі қызметкерлері зергерлік пен қыш өнерінің қыр-сырына қанық болып, киіз басу, тоқыма өнерлерінен шеберлік кластарын көруге шақырады.
Астанадағы Алматы облысының мәдениет күндері 15 шілдеде ЭКСПО алаңындағы амфитеатрда ұйымдастырылатын «Жерұйық – жасыл бауларым» атты концертпен қорытындыланады.
Динара БІТІКОВА,
«Егемен Қазақстан»