![Инвестор тартуда елшілер әлеуеті ескеріледі](/article_photo/1499741723_article_b.jpeg)
Қазақстанның 45 мемлекеттегі құрметті консулы мен біздің елімізде тіркелген 31 шет мемлекеттің 47 құрметті консулы қатысқан алқалы жиынға Сыртқы істер министрінің бірінші орынбасары Мұхтар Тілеуберді жетекшілік етті. Ол Мемлекет басшысының тапсырмасымен инвестициялық климатты жақсартуға бағытталған ел Үкіметінің негізгі жұмыстары туралы баяндады.
Бүгінгі таңда Қазақстан инвестициялық ахуалды жақсартып, оның жұмыс істеу мүмкіндігін кеңейту мақсатында жеңілдетілген салық түрін ұлттық заңнамамен қамтамасыз етіп жатқаны белгілі. Сыртқы істер министрінің бірінші орынбасары экономикамыздың басымдыққа ие әртүрлі саласында инвестициялық жобаларды қолға алып жатқан инвесторларға мұндай әрекеттер мемлекет тарапынан әркез кепілдендірілетіндігін атап өтті.
«Сыртқы саясаттағы ведомстволар арқылы біз өз әрекетімізді жаңашыл әдіс-тәсілдермен жетілдіріп, қайта жаңғырту жұмыстарын жүргізудеміз. Соның нәтижесінде, қазақстандық экономиканың басым бағыттары инновациялық технологиялармен жарақтандырылып, шетелдік инвестиция көлемі артуы тиіс. Сонымен қатар, отандық өнімдерді шет мемлекеттердің нарығына шығару ісі де Сыртқы істер министрлігінің осы күнгі негізгі міндеттерінің біріне айналып отыр», деді М.Тілеуберді өзінің сөзінде.
Сондай-ақ, отырыста сөз алған Инвестициялар және даму вице-министрі Ерлан Қайыров қазір Қазақстанда шетелдік инвестициялардың өңдеу саласына салынуы жедел мақұлданатындығын айтып, соңғы кездері оның экономикаға құйылу көрсеткішінің көлемі өсіп келе жатқанын тілге тиек етті.
«Соңғы он екі жылдың ішінде Қазақстан экономикасына 245 млрд доллардан астам шетел инвестициясы құйылды. Ашығын айту керек, ол ақшаның басым бөлігі пайдалы қазбаларды игеруге жұмсалды. Десек те, Үкіметтің ендігі көздеген мақсаты – инвестицияларды өңдеу саласына тарту», деді ол.
Мұхтар Бескенұлының айтуынша, өткен жылы ел экономикасына тартылған инвестициялардың жалпы көлемі 2015 жылмен салыстырғанда 40 пайызға артық болған. Ал биылғы жылдың бірінші тоқсанында тікелей шетел инвестицияларының көлемі 20 пайызға көбейген.
Жиынға қатысушылар арасында өрбіген әңгіме ауанына қарап, Қазақстанда бизнес-серіктестіктің еркін дамуына мейлінше қолайлы жағдай жасалып жатқанын оңай аңғаруға болады. Ол Сыртқы істер министрлігі тарапынан жүзеге асырылып жатқан визалық саясаттың қалыптасуынан байқалады. Яғни, визасыз кеңістікті миграциялық заң шеңберінде кеңейту инвестициялық ахуалды жақсартып, еліміздің туристік әлеуетін арттыратыны сөзсіз.
Сонымен қатар, құрметті консулдар қатысқан отырыста «Kazakh Invest» АҚ пен «Атамекен» ҰК» АҚ және «Бәйтерек» Ұлттық басқарушы холдингі» АҚ сынды елдегі алпауыт компаниялардың жетекшілері арнайы баяндама жасап, өздерінің жобалары мен нарықтағы мүмкіндіктерін таныстырды.
Нұрлыбек ДОСЫБАЙ,
«Егемен Қазақстан»