![Қалалардың қалыпты дамуы қашанда маңызды](/article_photo/1500262566_article_b.jpeg)
Қауымдастық құрамындағы 28 қаланың 100-ге жуық өкілі мен 5 халықаралық бірлестік, 7 ғылыми және сараптамалық ұйымның мүшелері бас қосқан жиынға жетекшілік еткен Астана қаласының әкімі Әсет Исекешев мұндай сессиялардың қала басшылары үшін тәжірибе алмасу мен өзекті мәселелерді талқылауда тиімділігі мол екендігіне тоқталды. Сондай-ақ, ол өз сөзінде Шанхай ынтымақтастық ұйымына мүше елдердің Мэрлер кеңесін құру қажеттігін отырысқа қатысушылардың қаперіне салды.
«Бүгінгі жиын арқылы біз Ресей мен Қытай, Үндістан мен Орталық Азия елдері арасында ШЫҰ-ға мүше мемлекеттер қалаларының Мэрлер кеңесін құру бастамасын көтеріп отырмыз. Оның мақсаты – сауда саласындағы ынтымақтастық пен қалаларды дамыту саласындағы технологиялармен алмасуға, қала құрылысы, энергия тиімділігі, баламалы энергия көздері, смарт-технология, қоғамдық көліктер мен электронды коммерция-
ны дамытуға, университеттер арасындағы байланыстарды біріздендіруге бағытталады. Бұл мақсаттардың барлығы да ШЫҰ идеясына сай келеді», деді Ә.Исекешев.
Оның сөзіне қарағанда, Мэрлер кеңесі қызметке кіріскен жағдайда, ол нақты жоспарлар бойынша тұрақты іс-әрекеттер жүргізетін тәжірибелік алаңға айналған құрылым болуы тиіс. Сондықтан да, Мэрлер кеңесін құру бастамасы бүгінгі таңда өзекті болғандықтан, оның жұмысын биылғы күзден бастап кетуге мүмкіндіктер де жоқ емес.
Екі күнге созылған алқалы жиынның кезекті сессиясына жетекшілік еткен «ТМД-ның экономикалық дамуы іскерлік орталығы» коммерциялық емес серіктестігінің бас директоры Владимир Савченко ең алдымен халыққа сыйлық жасап, бұқара қауымды қуантуды Қазақстан Президентінен үйрену керек деп мәлімдегенін айта кетейік.
«Осыдан 25 жыл бұрын Алматы қаласында Тәуелсіз Мемлекеттер Достастығын құру туралы шартқа қол қойылғанын бәріміз білеміз. Ал бүгін біз салынғанына небәрі 19 жыл ғана болған қалада бас қосудамыз. Бұл қала Қазақстан Президентінің идеясымен және басшылығымен салынды және Нұрсұлтан Әбішұлы қысқа ғана уақыттың ішінде өз мемлекетінің беделін әлемдік биікке көтерген тұлға. Сондай-ақ, Біріккен Ұлттар Ұйы-
мы 29 тамызды жыл сайын Ядролық сынақтарға қарсы іс-қимылдың халықаралық күні ретінде атап өтетіні баршамызға мәлім. Адамзат баласы үшін игілігі мол осы істе де Қазақстан Президентінің еңбегі ерен. Тіпті, таяуда ғана елімізде ТМД елдерінің зиянды қалдықтарды жою мәселелеріне арналған сессиясы өткені есімізде. Ал бүгін қалаларды басқару бойынша жаңа басқарушылық құрылымдарды құру, халық үшін заманауи жайлы баспаналар салу мәселелерін талқылаудамыз. Біз Қазақстан Президентінен халыққа, мемлекетке қалай сыйлық жасауға болатынын үйренуіміз керек», деді В.Савченко.
Сонымен қатар, «Қаланың тұрақтылығын қамтамасыз ету үшін ақылды технологияларды енгізу» және «Заманауи урбанизация жағдайында көлік жүйесін басқару» сынды тақырыптық секциялармен жалғасқан жиында елорда әкімдігі Астанада бой көтеріп жатқан жаңа аквапарк пен сауда, ойын-сауық орталығының жобасын жұртшылыққа таныстырды. Өзінің сөзінде Ә.Исекешев «Сити Палас» деп аталатын көпбейінді сауда, ойын-сауық орталығының құрылысы қаланың оң жағалауында салынып жатқанын тілге тиек етті.
«Бұл ғимарат Республика даңғылы мен А.Иманов көшесінің қиылысында орналасқан. Сондай-ақ, «Нұрлы жол» гүлзарының бойында «Керуен-2» сауда, ойын-сауық орталығын салып, жаңа аквапарктің құрылысын Қазақ елі алаңы ауданында жүргізу жоспарланып отыр», деді ол.
Айта кетейік, 1998 жылдың 3 қыркүйегінен бері қызмет етіп келе жатқан қауымдастық ТМД-ның 9 мемлекетіндегі 19 ірі қала әкімдіктерінің бастамасымен құрылған болатын. Бүгінде ұйым құрамына 87 қала қабылданған болса, оған Қазақстанның 9 қаласы кіреді.
Нұрлыбек ДОСЫБАЙ,
«Егемен Қазақстан»