Осыған орай республика халқы тығыз орналасқан оңтүстік аймақтардан көшіп келушілерді орналастырудың, жұмыспен, баспанамен қамтамасыз етудің жергілікті бағдарламасы жасалып, жыл аяғына дейін 600 отбасын қабылдау жоспарланған. Қазір 78 отбасыға мемлекеттік қаржылай көмек көрсетілген. Былтыр квотадағы 110 отбасының орнына 130 отбасы қабылданған болатын.
Облыстық жұмыспен қамтуды үйлестіру және әлеуметтік бағдарламалар басқармасының басшысы Сергей Яковенконың айтуынша,
өңірлерден көшіп келуге ниетті адамдарға теріскейде бір мыңға жуық бос жұмыс орны қарастырылып отыр. 13 ауданда 700-дей үй әзірленген. Бірінші кезекте мұғалімдерге, дәрігерлерге, жұмысшы мамандықтарына қатты зәрулік байқалады.
Жұмыспен қамту жобасы аясында өңіраралық еңбек нарығын дамытуға белсене қатысып, жеке шаруашылығын ұршықша үйіріп жүргендердің бірі – Шералиевтер отбасы. «Бегалиев Акбаралы» жеке кәсіпкерлігінде еңбек ететін Юсубәлі былтыр отбасымен Қызылжар ауданының Соколов ауылына көшіп келген. Қазір бұл әулеттен сегіз адам 5,5 гектар жерге көкөніс өсірумен айналысады. Былтырғыдай биыл да шығым жақсы. Жиын-терім аяқталғаннан кейін үш жылыжайдың құрылысына кіріспек ойлары бар.
– Өткен жылы Оңтүстік Қазақстан облысынан 16 отбасы, биыл 7 отбасы көшіп келді. Шаңырақ иесіне 50, отбасы мүшелеріне 35 айлық есептік көрсеткіш көлемінде бір реттік жәрдемақы төленді. Бұдан тысқары коммуналдық төлемдер мен жалға алу шығындары да өтеледі, – деді өз әңгімесінде Қызылжар аудандық жұмыспен қамту орталығының директоры Раушан Тәкібаева.
Оңтүстік жақтан қоныс аударушылардың кәсібі мен нәсібін қатар алып жүруіне жан-жақты қамқорлық жасап жүрген «Мәмбетов және К» командиттік серіктестігінің бас директоры Еркебұлан Мәмбетов Сарыағаш ауданынан келген Ғани Жүсіпбековтің еңбекқорлығы мен тындырымдылығына дән риза. Отағасыға да, отанасына да жұмыс тауып беріп, баспана, мал сатып әперген. Отыны, шөбі үюлі. Тұңғыштары бірінші сыныпқа барса, кішісі балабақшада. Солтүстіктің қытымыр ауа райына үйреніп қалған олар картоп өсіріп, несібелерін айырып отыр. Еркебұлан Нұрмағамбетұлы 3 миллион теңге жеңілдікті несие ресімдеп, жеке шаруашылығын ашуға да жәрдемдесіпті.
Жуырда Мамлют ауданының Ленин елді мекеніне Жамбыл облысының Қордай ауданынан дүнген ағайындардың 13 отбасы орналасып, олар келе салысымен бірден жер өңдеуге кірісіп кетті. Бәрінен де оқушылары азайып, жабылу қаупі төніп тұрған мектептің сақталып қалғаны сүйсінтеді.
Күнгей жұртын теріскейге қоныстандыру бағдарламасының орындалуы аймақ басшылығының жіті назарында тұр.
Өмір ЕСҚАЛИ,
«Егемен Қазақстан»
Солтүстік Қазақстан облысы