![Экология проблемасы алаңдатады](/article_photo/1501043297_article_b.jpeg)
Бұл БҰҰ Даму бағдарламасы бойынша қолға алынып отырған шара. Жобаның осы саладағы ұлттық сарапшысы Төлебай Әділовтің айтуынша, аталмыш проблемамен БҰҰ Даму бағдарламасы 2015 жылдан бері айналысып келеді. Міне, сол уақытта «Төмен көміртекті дамуға орнықты қалалар» атты кең көлемді жоба қолға алынған еді. Оның құрамына Қазақстанның 15 шағын және ірі қалалары кірсе, оның ішінде Семей негізгілерінің бірі болып саналды.
– Біз республиканың әр түкпіріндегі тұрғындармен және жұртшылық өкілдерімен пікірлесе келе, Қазақстанның экологиялық проблемасын шешіп, табиғи және халықаралық туризмді дамыту үшін осы жобаның айқын қажеттілігін сездік, – деді Төлебай Әділов. – Елбасымыз жасыл экология деп ұсынып отырған жобаны түрлі деңгейдегі әкімдердің түсіне алмайтындығын да байқадық. Ауаға көмірқышқыл газының шығуын азайту елімізді әлемдегі ең дамыған 30 елдің қатарына қосады. Бірақ, қазір Қазақстан атмосфераға зиянды қалдықтар шығарудың көшбасшысы болып қалып тұр. Сондықтан да қазір елімізде қоғамды экологиялық проблемаларға назар аударту үшін ірі ақпараттық жұмыс тобы іске кіріскен.
– Адамның ұғымын, санасын өзгертуде қоғамның орны ерекше, – деді Парламент Мәжілісінің IV және V шақырылымының депутаты, бүгінде БҰҰ Даму бағдарламасының осы тақырып бойынша кеңесшісі Айгүл Соловьева, – Қоғамдық ұйым өкілдері заң жарғыларын тиімді пайдаланып, тұрғындармен және атқарушы билікпен жұмыс жүргізе білу керек.
Раушан НҰҒМАНБЕК
СЕМЕЙ
Суретті түсірген автор